Ciencia en feminino, o ciclo de charlas e mesas redondas organizado por Gciencia en colaboración coa Deputación de Pontevedra, estrea o seu cuarto e último capítulo da tempada. A protagonista deste novo episodio é a astrofísica viguesa Begoña Vila que traballa actualmente na NASA e forma parte do grupo de traballo do telescopio James Webb, que está afacer historia no eido da astronomía. Falamos con ela sobre a súa vocación, a súa experiencia na NASA e a súa carreira profesional nun ámbito tradicionalmente masculinizado.
Begoña Vila pecha a edición 2024 de Ciencia en feminino, que pretende dar voz ás mulleres de ciencia co gallo do 8M. A primeira mesa redonda, celebrada o 14 de marzo, abordou a importancia das vocacións científicas da man das investigadoras Alicia L. Bruzos, Blanca Moncunill Solé e Uxía García Luis. A segunda sesión, que se desenvolveu o 21 de marzo, tivo como protagonista a Catalina Fernández de Ana Portela, CEO de Hifas da Terra. A terceira actividade, centrada nas dificultades de investigar no estranxeiro e celebrada o 4 de abril, contou coas científicas galegas Raquel Lama, Cristina Lazcano e Carmen Figueras.
