Este luns producirase unha eclipse solar que se podería ver dende Galicia, único lugar da península que tería este privilexio. Con todo, o tempo non acompaña para poder desfrutar deste fenómeno. As choivas inundarán Galicia e o ceo estará encapotado pola noite, segundo datos de Meteogalicia, coincidindo co momento no que a eclipse dará comezo na nosa comunidade.
Un tempo desfavorable compleméntase coa hora na que se inicia a eclipse, que tampouco xoga en vantaxe para poder ver o evento dende Galicia. O acontecemento poderase ver a partir das 21:02 horas, sete minutos antes do ocaso na zona da Coruña, o que deixará un curto período de tempo para a súa contemplación.
O fenómeno será total en México, Estados Unidos (dende Texas ata Maine) e Canadá, franxa a través da que se poderá ver no seu máximo esplendor. Mais en Galicia será un tipo de eclipse solar parcial, onde unha parte da Terra é ‘devorada’ pola sombra que proxecta a Lúa ao pasar entre o planeta e o Sol nunha aliñación imperfecta.
Porén, este tipo de eclipse parcial é tamén a primeira fase do total, coñecida como primeiro contacto. Ocorre cando a Lúa comeza a pasar entre o Sol e a Terra, e toca por primeira vez a estrela, polo que ao inicio non se cobre por completo. Neste momento, o astro poderase ver en forma de media lúa. Este primeiro paso poderase apreciar na maioría de lugares onde se estima ver a eclipse, mais en Galicia só se poderá observar o fenómeno deste xeito.
A derradeira vez que se produciu unha eclipse solar parcial foi o ano pasado, o 14 de outubro, cando puido apreciarse levemente dende Canarias. Para poder contemplar unha eclipse total en España haberá que esperar ata o 12 de agosto de 2026, segundo o departamento de Astronomía do Instituto Xeográfico Nacional.
A eclipse galega
O público interesado corre o risco de non poder ver a eclipse dende os seus fogares. En España, só as Illas Canarias e Galicia poderán ser testemuñas deste acontecemento. O oeste do territorio galego é o lugar onde se poderá apreciar o fenómeno con máis claridade. Polo tanto, os veciños do interior de Galicia terán menos posibilidades de ver a eclipse, tanto por duración como por visibilidade.
A Costa da Morte convértese no mellor lugar onde contemplar fenómeno astronómico. Durará un tempo aproximado de nove minutos e medio nesta zona da Coruña, mentres que en Santiago de Compostela a duración estimada será de seis minutos, pola súa localización fóra do extremo noroeste.
A preparación do fenómeno
Os datos fundamentais que precisa saber todo aquel posible espectador é a necesidade de usar protección visual. En Galicia, ao tratarse dunha eclipse solar parcial, recoméndase o uso de lentes certificadas que cumpran coa norma ISO 12312-2, e non empregar lentes de sol comúns. Pola contra, en Norteamérica, a elipse solar total vai permitir ao público quitar a protección ocular especializada no momento da ocultación total do Sol. O mesmo ocorrerá coa observación da eclipse a través de cámara, binoculares e telescopios, pois terase que empregar un filtro solar especial para evitar lesións oculares graves de xeito instantáneo.
Aínda que a proteccion é esencial para poder ver a eclipse, tamén é importante saber onde vela. No extremo máis oeste de Galicia é o lugar onde mellor se poderá ver este fenómeno. Concretamente, para unha maior posibilidade de visualización da eclipse, os potenciais espectadores deberían buscar unha planicie aberta e sen obstáculos visuais que permita ver o ceo completamente despexado, sempre que o tempo dea unha pequena tregua.
