Un equipo coordinado polo profesor do Instituto de Biotecnoloxía e Biomedicina e do Departamento de Xenética e Microbioloxía da Universidade Autonóma de Barcelona (UAB) Antonio Villaverde, coa participación do Instituto de Investigación Sant Pau e o CIBER-BBN, desenvolveu micromateriais autocontidos, compostos unicamente de proteínas, capaces de entregar de forma prolongada no tempo o polipéptido que os compón.
A tecnoloxía utilizada para a fabricación destes gránulos, e que foi patentada polos investigadores, é relativamente simple e imita a organización dos gránulos secretores do sistema endócrino humano. Desde o punto de vista da estrutura química, implica a coordinación do zinc iónico con dominios ricos en histidina, un aminoácido esencial para os seres vivos e por tanto, non tóxico.
Os novos micromateriais están formados por unhas cadeas de aminoácidos denominadas polipéptidos, que son funcionais e están biodispoñibles en forma de nanopartículas para ser liberadas e dirixirse a tipos específicos de células cancerosas para a súa destrución selectiva.
O equipo de investigación analizou a estrutura molecular destes materiais así como a dinámica do proceso de secreción tanto in vitro como en animais. Nun modelo animal de cancro colorrectal CXCR4+, o sistema mostrou un alto rendemento trala administración subcutánea e observouse como as nanopartículas de proteína liberadas se acumulan nos tecidos tumorais dos ratos. “É importante destacar que dita acumulación é máis eficaz que cando a proteína se administra no torrente sanguíneo. Este feito ofrece unha nova e inesperada forma de garantir altos niveis locais de fármaco e unha mellor eficacia clínica, evitando réximes de administración intravenosa repetida”, explica Villaverde.
Segundo o investigador, “no contexto clínico, o uso destes materiais no tratamento do cancro colorrectal debería mellorar en gran medida a eficacia do fármaco e o confort do paciente, á vez que minimizaría os efectos secundarios non desexados”.
Na investigación, executada principalmente pola investigadora da UAB Julieta M. Sánchez, participaron investigadores do Departamento de Xenética e Microbiología da UAB, do Instituto de Biomedicina e Biotecnoloxía da UAB (IBB-UAB), así como o equipo de Oncoxénese e Fármacos Antitumorais liderado polo profesor Ramón Mangues do Instituto de Investigación Sant Pau.
