O Sistema de Vixilancia Atmosférica Copernicus Sentinel alertou este xoves que os incendios forestais de Portugal xa liberaron o nivel máis alto de emisións de carbono nun mes de setembro nos 22 anos do conxunto de datos analizados polo Sistema Mundial de Asimilación de Incendios (GFAS, polas súas siglas en inglés).
Segundo os datos recollidos, as emisións totais de carbono acadaron a cifra de 1,9 megatoneladas de carbono. O episodio máis semellante en canto a cantidade de emisións remóntase ao mes de setembro do 2003, cando se liberaron arredor de 1 megatonelada de carbono.
Dende o 14 de setembro a situación é crítica en Portugal: os máis de 100 focos activos están a liberar no aire partículas de carbono e contaminantes daniños, como as PM10 e PM2,5, que causarán que a calidade do aire a escala mundial e rexional en Europa empeore nos vindeiros días, acadando niveis de perigosidade para a saúde humana e activando alertas nos concellos galegos localizados no sur da comunidade.
Medidas de prevención
De feito, Copernicus alertaba no martes da chegada dun transporte masivo de fume nos vindeiros días cara o norte da península, que terá unha influencia especialmente notable en Galicia. Ante a situación extraordinaria, recoméndanse unha serie de pautas para evitar a exposición ao fume:
- Atende ás mensaxes emitidas polas autoridades competentes de saúde pública.
- Presta tamén atención aos índices de calidade do aire.
- Evita na medida do posible estar ao aire libre.
- Mantén o interior do teu fogar tan limpo como sexa posible, coas portas e as xanelas pechadas.
- Se a concentración de fume é moi alta, tenta non acender ningún dispositivo que queime, como por exemplo unha cheminea ou lareira.
- Non pase a aspiradora, xa que isto movería aínda máis as partículas que xa se atopen dentro do fogar.
- Se é fumador, evite na medida do posible facelo, xa que isto tamén aumenta a contaminación presente no aire.
- Para protexer os pulmóns pode empregar unha máscara N95. As outras máscaras non protexen fronte as partículas do fume dos incendios, moito máis pequenas.
Segue a actualidade sobre os incendios forestais de Portugal:
Sobre os incendios forestais
No caso de detectar un lume forestal, podes chamar ao teléfono gratuíro 085. Se sospeitas dunha actividade delituosa incendiaria da que teñas sospeita ou coñecemento, podes chamar ao 900 812 085, tamén gratuíto e anónimo. Se queres información actualizada sobre os incendios forestais que acaden as 20 hectáreas podes consultala na conta @incendios085
