Cinco días despois do inicio dos incendios masivos en Portugal, o balance segue a ser estremecedor: máis de 10.000 hectáreas queimadas, sete mortos e máis de 5.000 bombeiros traballando contra o lume. Varias estradas permanecen pechadas no país veciño, e nalgunha localidade a poboación vese obrigada a desprazarse para fuxir dos incendios máis próximos. O índice de calidade do aire empeora por momentos, e os avisos non deixan de aparecer nos móbiles dos cidadáns portugueses alertando dun novo foco preto de onde se atopan.
Manterse informado nun episodio coma este é crucial e, nese sentido, as aplicacións en tempo real poden ser unha axuda moi valiosa. É o caso do mapa Bseed Watch elaborado por Pyro, unha empresa especializada en extinción e prevención de lumes forestais. A páxina web permite rastrexar a cada momento os focos activos na península ibérica grazas ás imaxes e datos facilitados polos satélites MODIS e VIIRS, ambos da NASA.
Os incendios en Galicia
A aplicación permite consultar os puntos quentes de cada rexión, a hora á cal se iniciou o lume e o momento no que os satélites tomaron os datos. En Galicia, segundo o mapa actualizado de Pyro, hai activos unha serie de focos distribuídos polas provincias de Pontevedra, Ourense e Lugo: o máis virulento atópase no municipio ourensán de Barxa, con máis de 100 puntos quentes, a meirande parte deles activos dende hai dous días. En Castromil, tamén en Ourense a situación é máis estable dende hai máis de 48 horas; porén, aínda mantén máis de 40 puntos quentes segundo o mapa de Pyro e a superficie queimada estímase que xa chega aos 12 quilómetros cadrados.
Os outros focos activos, de menor tamaño, atópanse preto da Serra do Xistral, no concello da Cañiza, no Irixo e no municipio de Toques preto de Melide. Hai menos de 12 horas activouse un novo lume no municipio pontevedrés de Fornelos de Montes e, na madrugada de hoxe, outro en Guitiriz.
Con todo, en Galicia a principal preocupación nos vindeiros días non será ocasionada polos incendios forestais activos na comunidade, senón pola chegada masiva de fume froito dos incendios no territorio portugués.
Sobre os incendios forestais
No caso de detectar un lume forestal, podes chamar ao teléfono gratuíro 085. Se sospeitas dunha actividade delituosa incendiaria da que teñas sospeita ou coñecemento, podes chamar ao 900 812 085, tamén gratuíto e anónimo. Se queres información actualizada sobre os incendios forestais que acaden as 20 hectáreas podes consultala na conta @incendios085
