O lume xa arrasou nos últimos dous días máis de 300 hectáreas nos concellos da Gudiña, o máis afectado, Laza, Arbo e Porto do Son. Segundo a última actualización da Consellería de Medio Rural, o primeiro dos lumes, que afectou á parroquia de Pentes, xa está estabilizado. Iniciouse o luns e en menos de 24 horas arrasou 150 hectáreas. Tamén na provincia de Ourense, outro lume queimou 60 hectáreas na parroquia de Trez, en Laza. O incendio, que se iniciou o domingo, permanece estabilizado. As feridas destes dous lumes, os que queimaron unha maior superficie nas últimas horas, pódense ver nas imaxes aéreas do Sistema Europeo de Información sobre Incendios Forestais (EFFIS) do programa Copernicus.
Amais destes dous lumes, xa se logrou extinguir o da parroquia de Mourentán, no municipio pontevedrés de Arbo. Iniciouse o domingo e afectou a 22,7 hectáreas, sendo 20,9 de monte arborado e 1,8 de monte raso. Hai outros dous incendios activos, un na parroquia de Barxa, tamén na Gudiña que, segundo a última actualización de Medio Rural a través da canle de X (antes Twitter) @incendios085, queimou xa 60 hectáreas. Esta madrugada tamén suscitou moita preocupación o incendio de Porto do Son, que arrasou 15 hectáreas, por achegarse moito ás vivendas. A vista tamén está posta en Portugal, cunha vaga de incendios que está a afectar principalmente á metade norte do país veciño.
No caso de detectar un lume forestal, podes chamar ao teléfono gratuíro 085. Se sospeitas dunha actividade delituosa incendiaria da que teñas sospeita ou coñecemento, podes chamar ao 900 812 085, tamén gratuíto e anónimo. Se queres información actualizada sobre os incendios forestais que acaden as 20 hectáreas podes consultala na conta @incendios085
