Galicia é dende o luns un territorio cun mar revolucionado. As mareas vivas esténdese por toda a costa, con diferenzas perceptibles no territorio. Trátase dun fénomeno astronómico, pois coinciden cando Lúa, Sol e Terra están situados, máis ou menos, en liña recta. O satélite e a estrela exercen unha forza gravitacional sobre os océanos do planeta, pero a Lúa, máis cerca del, ten unha influencia maior. Así, cando están aliñados, fan que as forzas gravitacionais da Lúa e do Sol se sumen, aumentando a atracción dos océanos e a amplitude das mareas.
Así, este xoves será o día no que se percibirá con máis forza este fenómeno, mais non hai unha explicación concreta. Ten que coincidir o máximo gravitatorio do Sol e da Lúa, influíndo ademais a posición da Terra con respecto ao Sol. Como ocorre neste caso, o día máis forte pode coincidir coa segunda ou a terceira marea da lúa chea, como informan dende Meteogalicia.
Con todo, “isto xa está rematando”, explica un dos técnicos deste organismo, pois esta etapa da lúa produciuse na noite do mércores, e a partir de hoxe comezará a adoptar a súa forma minguante. Con todo, son mareas equinocciais, que se repiten dúas veces cada ano: en setembro e marzo. Aínda así, non sempre se producen coa mesma intensidade.
Fenómeno astronómico, pero tamén meteorolóxico
Esta semana, o factor que marca a diferenza é o perixeo, o punto máis próximo ao centro da Terra na órbita da Lúa. Polo tanto, a atracción gravitatoria aumenta, e a forza que exerce sobre o mar é máis forte do habitual. Así, provócanse estas mareas vivas máis elevadas.
Ademais do notorio compoñente astronómico deste fenómeno, que é máxima a causa da confluencia entre Sol, Terra e Lúa no mesmo plano, pode contar tamén cun factor meterolóxico: o nivel do mar. No caso actual, en Galicia hai unha situación de estabilidade sen borrascas próximas, o que favorece a falta de posibles consecuencias negativas.
Normalmente, xa que se producen con frecuencia, os litorais están deseñados para facer fronte ás posibles adversidades das mareas. Mais, con meteoroloxía adversa, pódense producir inundacións importantes. Un exemplo son os furacáns, que producen baixadas no mar moi profundas e subidas de nivel moi importantes, como ocorreu no Katrina. Dende Meteogalicia consideran que, “ás veces, o peor dos furacáns poden ser as mareas, máis que o vento ou a chuvia”.
Diferenzas no territorio
Aínda que as mareas vivas se perciben ao longo da costa galega, os diferentes puntos da xeografía están a vivir este fenómeno de xeitos diferentes. Entre os municipios galegos, Foz convértese no máis afectado, pois a preamar podería alcanzar unha altura de 4,6 metros ás 18 horas de hoxe, segundo datos de Meteogalicia.
Deste xeito, poderíase confirmar o xoves como “o día grande” destas mareas. En Vigo e Vilagarcía, nas Rías Baixas, as augas poderían chegar aos 4,2 metros de máxima. Mentres que, na Guarda, a maior altura chegará pola tarde, con 3,8 metros, unha das cifras máis baixas.
No norte do territorio, na tarde de Corcubión, a preamar acadará os 4,3 metros. En Ferrol prevense 4,4 metros de altura. E en Muros e Ribera ocorrerá un fenómeno semellante, con 4,3 e 4,4 metros, respectivamente. Con todo, a partir do venres as mareas volverán ao seu cauce.
