Dúas mangas mariñas sorprenderon onte na ría de Arousa e na de Pontevedra, provocadas polas cambiantes condicións meterolóxicas do temporal. Trátase dun fenómeno relativamente frecuente, que adoita acontecer todos os anos en Galicia coincidindo con episodios de moita inestabilidade atmosférica. Porén, chama a atención pola súa semellanza cos tornados moito máis potentes que se producen noutras zonas do planeta.
O fenómeno na ría de Arousa rexistrouse na mañá e foi gravado e fotografado por varias testemuñas, como podemos ver neste vídeo:
Ademais, houbo outra manga mariña na ría de Pontevedra, á altura de cabo Udra, que foi avistada por un barco pesqueiro. Esta é a imaxe captada polos tripulantes do buque:
Tamén hai un vídeo que foi reproducido en Twitter:
“Es mi vida vi algo así”, dijo el veterano patrón, de 74 añoshttps://t.co/nKXTusUSpM pic.twitter.com/12dVQyCZO0
— Faro Pontevedra (@FaroPontevedra) 8 de mayo de 2019
Aínda que non adoitan causar danos, xa que normalmente comezan no mar e se debilitan moito cando tocan terra, as mangas mariñas teñen xerado algúns episodios coñecidos nos últimos anos en Galicia. En novembro de 2018, este fenómeno arrasou un monte en Muros, e en xaneiro do ano pasado, outro suceso semellante causou danos materiais na provincia de Pontevedra.
Segundo teñen explicado noutras ocasións expertos como Carlos F. Balseiro, de 4gotas, a manga mariña aparece cando as precipitacións intensas “arrastran o aire moi frío en altura cara a abaixo, polo que se xeran unhas diferenzas de temperatura moi altas en zonas moi concretas, polo que o vento ten que compensalas”, explicaba Balseiro.
Como consecuencia disto, o chaparrón “sae dunha nube de tormenta e provoca un funil que comeza a enroscarse debido ao vento”, mesmo podendo chegar a terra, conta o responsable de 4gotas. Porén, unha vez perde contacto coa humidade do mar, a manga mariña “perde a rotación e desfaise”, apunta Fernández Balseiro.