Unha manga mariña deixouse ver na mañá deste mércores en augas da ría de Arousa. É un fenómeno relativamente frecuente, que adoita acontecer todos os anos en Galicia coincidindo con episodios de moita inestabilidade atmosférica. Porén, chama a atención pola súa semellanza cos tornados moito máis potentes que se producen noutras zonas do planeta.
Aínda que non adoitan causar danos, xa que normalmente comezan no mar e se debilitan moito cando tocan terra, as mangas mariñas teñen xerado algúns episodios coñecidos nos últimos anos en Galicia. En novembro de 2018, este fenómeno arrasou un monte en Muros, e en xaneiro do ano pasado, outro suceso semellante causou danos materiais na provincia de Pontevedra.
Segundo teñen explicado noutras ocasións expertos como Carlos F. Balseiro, de 4gotas, a manga mariña aparece cando as precipitacións intensas “arrastran o aire moi frío en altura cara a abaixo, polo que se xeran unhas diferenzas de temperatura moi altas en zonas moi concretas, polo que o vento ten que compensalas”, explicaba Balseiro.
Como consecuencia disto, o chaparrón “sae dunha nube de tormenta e provoca un funil que comeza a enroscarse debido ao vento”, mesmo podendo chegar a terra, conta o responsable de 4gotas. Porén, unha vez perde contacto coa humidade do mar, a manga mariña “perde a rotación e desfaise”, apunta Fernández Balseiro.
O episodio deste mércores en Arousa mesmo foi gravado por algunhas persoas, como se pode ver neste vídeo:
Aviso por temporal
A inestabilidade atmosférica é notoria en Galicia na xornada do mércores, e seguirá durante o xoves. Está activado o aviso laranxa por ondas de 5 a 6 metros entre Bares e Corrubedo, así como o nivel amarelo no resto da costa, a práctica totalidade da provincia da Coruña, a Mariña lucense e a montaña de Lugo e Ourense por refachos de vento de ata 80 km/h.
Para o xoves agárdanse intensas precipitacións, que poderán acumular ata 80 litros por metro cadrado desde o mediodía na provincia de Pontevedra e o oeste da Coruña. Por isto está activado o aviso amarelo.
