Tralo paso dunha fronte de aire frío os primeiros días de agosto, os ceos en Galicia despexáronse e as temperaturas subiron progresivamente dende o pasado venres. Foi o preludio do que se converterá estes días nunha onda de calor que poderá deixar ata 40 graos nalgúns puntos do país. A xornada máis calorosa será a do martes, especialmente en zonas da metade sur de Galicia, con valores por riba dos 30 graos. Nestes momentos está activa a alerta amarela en varias zonas de Pontevedra, Lugo e Ourense, como nas Rías Baixas, no Baixo Miño e na comarca de Valdeorras. En Val do Miño o aviso é laranxa, xa que se poden alcanzar os 40 graos a partir do mediodía do martes.
A entrada de aire cálido e a baixada do vento do nordés soben as temperaturas e tamén a sensación térmica. No sur de Lugo e no Miño de Ourense chegaranse aos 38 graos e nas Rías Baixas aos 34. O interior de Pontevedra tamén ten decretado o aviso amarelo polos 36 graos que poden marcar os temómetros o martes, como no noroeste e sur de Ourense ou sur de Lugo. Durante esta vaga de calor, o vento do norte deixará termómetros por debaixo dos 20 graos na Mariña. Na Coruña poderán superarse os 34 graos estes días pero non está activa ningunha alerta.
Xa de cara o mércores, prevese moita nubosidade no litoral oeste e baixa visibilidade con brétemas costeiras. Explica MeteoGalicia que haberá vento do sur, co cal, descenderán as temperaturas no litoral onde queden as nubes máis compactas, e será máis notable na fachada atlántica. Á vez, co vento do sur, ascenderás as temperaturas na Mariña. Superaranse os 30 graos na provincia de Lugo. Será unha semana de calor en Galicia pero a partir do mércores baixarán as temperaturas e manteranse valores estables por debaixo por 30 graos.
Galicia afronta a semana máis cálida do ano, contrastando co pasado mes de xullo, que destacou principalmente pola alternancia da inestabilidade atmosférica e o tempo de verán, no que se mantiveron temperaturas frescas para a época. O país logrou esquivar as pasadas ondas de calor que afectaron a España, mais non será así desta vez.
