Galicia empeza agosto co paraugas en man. Este martes, no sur da Coruña e de Pontevedra predominan as nubes baixas e os orballos. Aínda que pola tarde poidan abrirse claros, á noite volverán as precipitacións. O mércores entra unha fronte fría e choverá con máis intensidade. Entrará pola tarde o aire do norte e con el, chegará o xoves a influencia anticiclónica. As mínimas en Ourense esta semana baixarán e subirán ata nove graos. Para a fin de semana, agárdanse temperaturas que superarán os 30 graos. Unha semana de contrastes, pero que será estable en todo o país.
Ata o momento predominaban os ventos de compoñente sur. Na Coruña, unha vez chega o vento do norte, caen os termómetros: pasarán de 27 a 22 graos. Nos próximos días baixarán as máximas en toda a fachada atlántica respecto aos valores das xornadas pasadas. Con todo, este está a ser un verán que non aguanta a calor e o Sol nin unha semana enteira. Que é o que está a pasar en Galicia para saltar continuamente de borrascas á calor de verán?
O culpable é o anticiclón das Azores. Galicia depende da súa posición, e, nestes momentos, debería estar situado de maneira que impedise a entrada de borrascas e de frontes, sendo o vento do nordés o que predominase. Este, deixa temperaturas máis suaves, nubes na zona da Mariña e ceos despexados en Pontevedra, Ourense e sur de Lugo con temperaturas máis cálidas. Este verán estándar en Galicia non se está cumprindo porque o anticiclón das Azores está retirado cara o sur, e permite que entre algunhas destas frontes.
Non obstante, esta é unha situación que forma parte da variabilidade do clima galego, e aída que poida parecer unha situación excepcional, dende MeteoGalicia explican que está quedando un verán normal. “Estas entradas do vento do oeste non nos permiten ver o sol, pero a partir desta semana vén o vento do norte”, explican. Co cal, as temperaturas experimentarán ascensos pronunciados a partir do venres. Galicia rematará a semana co parasol.
