Do chorro polar ás dinas: as claves do drástico cambio de tempo en Galicia a partir do mércores

A influencia anticiclónica debilitarase na segunda metade da semana coa previsión de ceos nubrados, temperaturas suaves e chuvascos ocasionais

Ás 11.10 horas deste martes xa se rexistraban 32,5 graos de máxima no concello pontevedrés das Neves. O día anterior, o luns 17, acadáronse os 41 graos en Salvaterra de Miño ás 17 horas, a maior temperatura do día en Galicia. Malia estas dúas xornadas de calor abafante, a comunidade estase a preparar para un drástico cambio de tempo e un brusco descenso dos termómetros, que dirán adeus á alerta vermella activada estes días en varios concellos. Unha forte ondulación do chorro polar e a previsión de dúas dinas traerán a inestabilidade a Galicia a partir do mércores debido á debilitación da influencia anticiclónica. Os ceos nubrados, as treboadas e as máximas de 25 graos marcarán os vindeiros días sen, ata o momento, previsión de que volten as alertas por calor.

Segundo explican dende o portal Meteored, a península vivirá un “cambio radical” de tempo a partir da segunda metade da semana. O chorro polar, unha corrente de ventos moi fortes, será en parte responsable da nova tendencia, ao trazar entre o venres e o domingo “un gran meandro” ao oeste da península. Isto, segundo explican dende a web especializada, pode desencadear tormentas moi intensas, choivas fortes e temperaturas baixas para esta época do ano na vertente atlántica. Amais disto, unha dina propiciará o descenso térmico a partir do mércores, coa previsión de que se rexistren treboadas en distintos puntos da península. Pode que a comezos da vindeira semana, outra dina propicie o tempo inestable en Galicia.

Publicidade

Segundo a previsión de Meteogalicia, o cambio tamén vai ser brusco entre o martes —con máximas estimadas de 42 graos en Ourense— e o mércores, cando xa se rexistrará, como mínimo, un descenso de seis graos. Así, espéranse ceos nubrados e posibles chuvascos treboentos no sur e no sueste da comunidade. Nas últimas horas do mércores entrará unha fronte polo noroeste de Galicia que marcará a mañá do xoves, sobre todo na metade norte, con chuvascos ocasionais e nubes abundantes. A partir do venres, a comunidade quedará nunha situación inestable e intermedia entre as altas e as baixas presións, coa debilitación da influencia anticiclónica e o aumento da probabilidade de chuvia de cara á vindeira semana.

DEIXAR UNHA RESPOSTA

Please enter your comment!
Please enter your name here

Este sitio usa Akismet para reducir o spam. Aprende como se procesan os datos dos teus comentarios.

Relacionadas

Unha autopista de humidade acende en Galicia alertas laranxas e amarelas por chuvia e vento

A sucesión de borrascas atlánticas deixará máis de 50 l/m2 en menos de 12 horas no oeste da comunidade e refachos de ata 100 km/h

A borrasca subtropical Charles regará Galicia con fortes chuvias durante o mércores

A nova zona de baixas presións tomará o relevo de Bruna e MeteoGalicia establece a alerta amarela en Ourense por precipitacións

O aire polar provocará un descenso brusco das temperaturas dende o martes en Galicia

O descenso térmico irá acompañado de vento de mar no litoral da Coruña, onde se ditamina a alerta amarela

Unha nova fronte atlántica acende a alerta por temporal marítimo na costa da Coruña

MeteoGalicia informa de que as precipitacións chegarán na xornada do martes, pero a influencia anticiclónica volverá a partir do mércores