O chorro polar traerá de volta unha masa de aire cálida a Galicia. As provincias do sur da comunidade serán as máis afectadas polo impacto das altas temperaturas de xeito local, concretamente no interior, litoral das Rías Baixas e o suroeste da Coruña. Así, MeteoGalicia activa a alerta amarela por calor durante o luns 27 de xullo na costa pontevedresa e na zona do Miño por máis de 34 graos, e no sur de Lugo e Miño de Ourense por superar os 36. Durante o martes, o aviso estenderase ao sur e noroeste de Ourense e Valdeorras, e rexistrarase unha alerta laranxa no Miño de Ourense, área que poderá chegar aos 39 graos.
Estes son os efectos dun profundo meandro, combinado co rexurdimento da dorsal subtropical dende o norte de África, tal e como anuncian dende o portal meteorolóxico Meteored, unha tendencia que leva dándose dende comezos do verán en Europa. En Galicia chega coa influencia das altas presións, con ceos despexados en todo o territorio, con algunha nube na Mariña lucense.
Segundo a previsión de MeteoGalicia, Ourense rozará os 40 graos o martes e Lugo acadará os 35. Pontevedra chegará aos 34, como ocorrerá en Santiago de Compostela e Vigo. Ferrol notificará 30 graos durante o luns e A Coruña 28, rexistrando as temperaturas máis moderadas. Con todo, os valores irán descendendo de xeito notable co paso dos días e, a partir do xoves, aumentará a porcentaxe de chuvia no norte e interior do territorio.
