A Axencia Estatal de Meteoroloxía (AEMET) rebaixa as primeiras predicións do modelo da axencia europea ECMWF, que o pasado martes situaba nun modelo ao furacán Helene en dirección Norte e tocando as costas de Galicia. Pero o paso das horas alivia esta predición, e a AEMET afirma que só existe un 10 por cento de probabilidade de que o Helene toque a costa galega, xa convertido nunha tormenta tropical con ventos entre 60 e 120 kms/hora.
A AEMET considera que a probabilidade é ‘moi baixa’ e, de chegar, os efectos desta tormenta tropical serían similares aos de moitas borrascas do inverno.
A ECMWF é unha organización intergubernamental participada por 21 países europeos e 13 estados asociados. A súa predición publicada o martes xa contrastaba coa feita por outro organismo meteorolóxico o Global Forecast System (GFS) dos Estados Unidos, que apuntaba noutra dirección. Segundo o GFS, o furacán ‘Helene’ non se dirixirá cara a América, pero quedará situado no medio do Atlántico, estable nunha zona próxima ás illas Azores.
Nas vindeiras horas, as incógnitas sobre o Helene quedarán confirmadas, segundo avance o ciclón cara o Norte polo Atlántico e as predicións sexan aínda máis fiables.
