Un pequeno burato preocupa desde hai días a varias axencias espaciais. O pasado 30 de agosto, o blog da NASA que informa sobre a Estación Espacial Internacional daba conta dun incidente acontecido no complexo o día anterior, o 29. Desde Houston e Moscú, os controladores atoparon signos dunha mínima fuga de presión nalgún lugar do complexo.
Last night, flight controllers in Houston and Moscow detected a minute pressure leak on station. The crew is in no danger and is actively working troubleshooting procedures. More: https://t.co/TGB4BGi4oZ
— Intl. Space Station (@Space_Station) 30 de agosto de 2018
Nese momento, os tripulantes estaban durmindo, polo que desde terra decidiron agardar a que espertasen, xa que non se atopaban en perigo. Porén, ao espertar, os seis astronautas puxéronse a traballar en colaboración cos controladores para buscar onde estaba a fuga, e atoparon que se localizaba no sector ruso. Activáronse entón os protocolos previstos para estas situacións.
E atoparon que o problema debíase a un pequeno furado na superficie da Soyuz, que provocou unha pequena perda de presión no interior. A situación quedou solucionada ao illar a fuga, de dous milímetros de diámetro. O astronauta ruso Sergey Prokopyev enviou un vídeo, que foi publicado nas redes sociais, no que explica como taponou o burato.
#НовостиИзНевесомости от космонавта Сергея Прокопьева:
«Друзья, решил снять видео, чтобы ответить на ваши многочисленные комментарии и развеять слухи. На МКС всё спокойно!» pic.twitter.com/ri7hKbe0SL
— РОСКОСМОС (@roscosmos) 10 de septiembre de 2018
Unha vez solucionado o problema, o traballo encamíñase a atopar a causa pola que se produciu o furado, ademais de comprobar outras posibles fugas, por agora descartadas. Roscosmos, a axencia espacial rusa, xa iniciou unha investigación para esclarecer o acontecido. Agárdase que as conclusións se publiquen nos vindeiros días. Fálase, entre outras hipóteses, do impacto dun pequeno meteorito.
Rumores
Porén, o feito non estivo exento de rumores e polémica. Segundo recolleu The Guardian, o director de Roscosmos, Dmitry Rogozin, afirmou que o burato “puido facerse deliberadamente, na Terra ou xa en órbita”. Engadiu que “hai varias marcas de taladro“, e preguntouse: “Isto que é? Un defecto de fabricación ou unha acción premeditada?”.
Ademais, segundo recolle o mesmo xornal británico, a NASA fixo aumentar a incerteza ao publicar fotos do burato, que pouco despois borrou sen explicacións.
No seu vídeo, con todo, o astronauta Prokopyev quixo tamén enviar unha mensaxe de tranquilidade ante os rumores: “Como poden ben, todo está ben e en calma, coma sempre”.
Na actualidade, está a bordo a Expedición 56 da Estación Espacial, composta por seis tripulantes: Drew Feustel, Ricky Arnold e Serena Auñón-Chancellor, da NASA, Alexander Gerst da ESA, e Oleg Artemyev e Sergey Prokopyev de Roscosmos.