Arredor de 125 varamentos desde que comezou 2019, a un ritmo de case dous cada día, e con xornadas na que chegaron a aparecer unha decena de animais nas costas galegas. É o reconto que fixo público este mércores a Coordinadora para o Estudo dos Mamíferos Mariños (Cemma), cunha infografía na que recolle todos os varamentos que rexistrou este ano.
“A maior parte dos casos son de golfiños comúns (Delphinus delphis)”, explica Alfredo López, con decenas de exemplares mortos. A cifra total chega case á metade da media anual (280 varamentos) aínda que a maioría deles se producen entre febreiro e marzo. Non en tanto, este ano foi extraordinaria a aparición de mamíferos mariños en xaneiro, entre os que estaban grandes cetáceos, como as baleas de Ponteceso, A Coruña ou Muxía.
Entre as outras especies, destacan tamén a tartaruga de coiro, arroaces, arroaces botos, caldeiróns, toniñas, focas ou cachalotes. Case todos eles apareceron xa mortos, e o resto moi debilitados, polo que non puido facerse nada máis para salvarlles a vida.
Liberación de Barizo
Por outra banda, o pasado 8 de marzo, desde o porto de Vigo partiu a bordo do arrastreiro Patricia Marta o lobo mariño Barizo, que aparecera o 6 de xaneiro neste porto de Malpica e que se recuperou durante dous meses na UCI do Instituto Galego de Formación en Acuicultura (IGAFA) da Illa de Arousa.
