Hamburguesas de xarda presentadas no proxecto. Foto: Arvi Innovapesca (Twitter).
Hamburguesas de xarda presentadas no proxecto. Foto: Arvi Innovapesca (Twitter).

O CSIC e os armadores de Marín desenvolven hamburguesas con descartes de peixe

O CSIC e a Asociación de Armadores de Marín presentaron en Vigo os resultados do proxecto Valdescar (Valorización de descartes), co que pretenden dar saída a especies que non poden ser debidamente aproveitadas debido á súa rápida degradación, á falta de demanda comercial ou ao exceso de oferta en determinados momentos.

Así, os investigadores conseguiron obter distintos produtos, como hamburguesas, nuggets e variñas, a partir do músculo picado de especies como a xarda, a faneca, o escacho, o lirio e o escarapote. “A recente reforma da Política Pesqueira Comunitaria (PPC) aposta por garantir que as pescarías sexan sostibles e, para iso, a valorización dos descartes é un aspecto fundamental”, expuxeron Ricardo Pérez e Javier Borderías, profesores de investigación do CSIC. O produto final é o denominado mince, unha pasta elaborada a partir de músculo picado de peixe, obtida tras extraer as vísceras e as espiñas.

Os estudos foron realizados polo grupo de Bioquímica dos Alimentos do Instituto de Investigacións Mariñas de Vigo e o grupo de valorización de pescados e saúde do Instituto de Ciencia y Tecnología de Alimentos y Nutrición de Madrid (Ictan). “Escolléronse estas especies polo interese do seu aproveitamento por parte dos armadores e a asociación, polas súas propiedades nutricionais, as características fisicoquímicas e organolépticas e pola estabilidade no ritmo de capturas”, segundo explicou Juan Martín, da  Organización de productores de pesca fresca do porto e da ría de Marín (Opromar).

Determinouse a aptitude tecnolóxica da carne dos diferentes peixes descartados e realizáronse probas empíricas de aptitude para determinar cal é a vía de aproveitamento máis axeitada para estas especies. A continuación, realizáronse estudos de viabilidade, probas e catas en distintos canais de comercialización.

 

DEIXAR UNHA RESPOSTA

Please enter your comment!
POLÍTICA DE COMENTARIOS:

GCiencia non publicará comentarios ofensivos, que non sexan respectuosos ou que conteñan expresións discriminatorias, difamatorias ou contrarias á lexislación vixente.

GCiencia no publicará comentarios ofensivos, que no sean respetuosos o que contentan expresiones discriminatorias, difamatorias o contrarias a la ley existente.

Please enter your name here

Este sitio emprega Akismet para reducir o spam. Aprende como se procesan os datos dos teus comentarios.