A xuntanza anual de Cephs and Chefs está a ter lugar na Facultade de Ciencias Políticas e Sociais. Foto: USC.
A xuntanza anual de Cephs and Chefs está a ter lugar na Facultade de Ciencias Políticas e Sociais. Foto: USC.

Os científicos buscan remedio á escaseza de polbo en Galicia

O proxecto Cephs and Chefs, no que participan investigadores da USC, celebra en Santiago de Compostela a súa segunda reunión anual

Os membros do proxecto Cephs and Chefs do que forma parte a Universidade de Santiago reúnense estes días na Facultade de Ciencias Políticas e Sociais da USC para continuar avanzando na sostibilidade das pesqueiras de cefalópodos en Europa, a análise da súa cadea de valor así como a identificación de novas oportunidades de negocio e mercados nos países do norte do continente.

Para este encontro, que supón a segunda reunión anual, a USC achegou un estudio de cadeas de valor de polbo (Octopus vulgaris) en Galicia, Asturias e Portugal, partindo dos produtores, comercializadores, distribuidores e consumidores finais. Os avances do proxecto permiten coñecer os fluxos de polbo desde a súa orixe ata a comercialización final, o que permite identificar cales son os factores que na actualidade desenvolven un papel clave na sostibilidade das pescarías así como na evolución da dinámica dos mercados pesqueiros. Na actualidade o grupo está a desenvolver unha enquisa en Europa para coñecer cales son as preferencias dos consumidores “con vistas a identificar novos mercados para os produtores galegos”, asegura o profesor Sebastián Villasante.

Estase investigando a oferta total de polbo en Galicia para coñecer máis polo miúdo o volume e valor da produción

Os investigadores galegos están investigando a oferta total de polbo en Galicia, que inclúe o volume e valor da produción local nas rías galegas e as importacións e exportacións desde ou cara a Galicia e a calquera parte do mundo tanto fresco coma conxelado ou en conserva. Polo de agora, os resultados indican que esa oferta (2.500 toneladas en 2018) non é capaz de satisfacer a crecente demanda deste produto dos comercializadores galegos debido ao aumento do seu consumo “non só no resto de España e da Unión Europea, senón tamén no mercado estadounidense”, explica Villasante. Así, á espera de se materialicen os proxectos para o desenvolvemento da acuicultura do polbo, as pescarías naturais son a única fonte para obter o prezado cefalópodo.

En Cephs and Chefs tamén participan o Galway-Mayo Institute of Technology; as universidades de Galway (Irlanda), Unicaen (Francia), Aveiro (Portugal) e Santiago de Compostela (España); o CSIC e IEO en España e IPMA en Portugal; o Marine Stewardship Council, Quadralia e Atlantic Gate Ltd; e ARVI, a Organización de produtores de peixe do Sur e Oeste de Irlanda e a Associação de Armadores de Pesca da Fuzeta desde o sector produtivo.

Desde a USC interveñen varios grupos: os membros do Grupo de Análise Económica dos Mercados e Institucións (AEMI) Sebastian Villasante, Manel Antelo, Pablo Pita e Joao Garcia Rodrigues, e o profesor Jacobo Feás, do grupo Valoración Financeira Aplicada (VALFINAP). O seu obxectivo consiste en desenvolver ferramentas prácticas para as administracións e a industria pesqueira con vistas a coñecer as características da cadea de valor, tales como os prezos dos cefalópodos, os actores involucrados, o emprego xerado, os perfís dos consumidores e as barreiras e oportunidades de negocio para os produtores e comercializadores.

DEIXAR UNHA RESPOSTA

Please enter your comment!
POLÍTICA DE COMENTARIOS:

GCiencia non publicará comentarios ofensivos, que non sexan respectuosos ou que conteñan expresións discriminatorias, difamatorias ou contrarias á lexislación vixente.

GCiencia no publicará comentarios ofensivos, que no sean respetuosos o que contentan expresiones discriminatorias, difamatorias o contrarias a la ley existente.

Please enter your name here

Este sitio emprega Akismet para reducir o spam. Aprende como se procesan os datos dos teus comentarios.