Un novo estudo do Centro Singular de Investigación en Medicina Molecular e Enfermidades Crónicas (CiMUS) da Universidade de Santiago (USC) descubriu novas claves para un envellecemento máis saudable. O traballo, presentado na revista Nature Communications, fala sobre as mutacións crípticas das mitocondrias, un tipo de alteración pouco estudada e que é crucial no avellentamento das células.
“A nosa investigación revela que estas mutacións crípticas son, de feito, as máis comúns nos tecidos envellecidos que xa non se dividen”, explica a investigadora do CiMUS da USC, Aurora Gómez. Estas alteracións logran esquivar os mecanismos naturais de defensa do organismo. Despois, acumúlanse lentamente ata alcanzar niveis elevados na mediana idade ou nas últimas etapas da vida.
O avellentamento é un proceso complexo que vai da man de enfermidades crónicas e cambios no noso organismo. Un factor que xa se coñecía que era importante neste proceso eran as alteracións nas mitocondrias, problemas nas “centrais enerxéticas” das nosas células. Investigacións realizadas ata o momento neste campo en ratos cun aumento artificial de mutacións no seu ADN mitocondrial mostraron signos de envellecemento acelerado. Pero hai un aspecto que pasou case desapercibido: as mutacións crípticas.
A restrición calórica, esencial na demora destas mutacións
“Descubrimos que estas mutacións están estreitamente relacionadas con varias características do envellecemento”, afirma Gómez. Por exemplo, o mal pregamento de proteínas e o estrés celular no retículo endoplásmático (RE), un órgano celular clave das células. “Ademais, os nosos experimentos confirman que este tipo de mutacións contribúe ao estrés do RE”, comenta a investigadora. Un dos aspectos máis prometedores segundo os científicos do CiMUS está vinculado á restrición calórica.
A estratexia xa era coñecida pola súa capacidade de frear o avellentamento. Agora, este estudo descubriu o impacto que ten na redución destas alteracións e mutacións das células. É dicir, que os investigadores comprenderán agora mellor un dos porqués dese éxito de neste tipo de dietas. Isto pode abrir a porta a novos estudos que exploren máis formas de ter unha vida máis saudable.
A disfunción mitocondrial está implicada en enfermidades neurodexenerativas como o párkinson ou o alzhéimer. “Neste estudo observamos tamén que as células cerebrais envellecidas con altos niveis de mutacións crípticas mostraban signos de neurodexeneración”, sinala.
Este é un achado importante que permitirá ao CiMUS seguir avanzando tamén nas súas investigacións no ámbito da neuroloxía. As conclusións deste estudo permiten unha abordaxe interdisciplinaria para ser abordadas dunha maneira óptima.
