O doutorando Daniel Cajade Pascual, investigador da área de Xeografía Física da USC, acadou o premio Jesús García Fernández na súa sexta edición, que outorga a Asociación Española de Geografía (AGE) aos investigadores novos por un traballo sobre o Guidoiro Areoso, un illote situado na ría de Arousa que nos últimos anos foi obxecto de diversos estudos debido á erosión que afecta a xacementos megalíticos presentes no lugar.
O traballo “La gestión de áreas litorales: El caso del islote Areoso” foi merecente do galardón por parte do xurado, que valorou “a orixinalidade e transversalidade da investigación, os métodos aplicados e a relevancia dos resultados obtidos”.
Daniel Cajade recolleu o galardón o pasado xoves 24 de outubro no 26º congreso da Asociación Española de Geografía, celebrado na cidade de Valencia. O premio recoñece deste xeito a relevancia das investigacións levadas a cabo por un equipo de traballo da área de Xeografía Física da USC, liderado polos profesores Ramón Blanco Chao e Manuela Costa Casais, e do que Daniel Cajade Pascual forma parte. Todos eles están integrados no Grupo de Investigación RODA.
