Ángel Carracedo: “A ciencia é parte indispensable do patrimonio cultural”

O catedrático en Medicina Legal, investigador e experto en xenética recolleu esta xoves o Premio Otero Pedrayo 2022

O catedrático en Medicina Legal, investigador e experto en xenética Ángel Carracedo vén de recoller o Premio Otero Pedrayo 2022 | Deputación da Coruña

O catedrático en Medicina Legal, investigador e experto en xenética Ángel Carracedo vén de recoller o Premio Otero Pedrayo 2022 nun acto institucional organizado pola Deputación da Coruña no Muncyt. Na súa intervención, Ángel Carracedo fixo unha alegación por considerar “a ciencia como unha parte indispensable do acervo cultural” e amosou a súa satisfacción “porque este premio recoñeza a ciencia como unha parte da Cultura, porque considero que é tamén un xeito eficaz un de achegar a propia ciencia á sociedade en xeral”.

O Premio Otero Pedrayo, organizado nesta edición 2022 pola Deputación da Coruña e convocado polas catro institucións provinciais e a Xunta de Galicia, recoñece, por primeira primeira vez, unha traxectoria centrada na investigación médica e científica. Neste sentido, Ángel Carracedo defendeu que “hai moitas similitudes entre a creación científica e a creación artística” e asegurou que “a ciencia comparte moitos aspectos coa arte, por iso entendo que debe considerarse como parte da Cultura e estar máis presente en formatos de divulgación culturais, como por exemplo nas páxinas de Cultura dos medios de comunicación”.

O presidente da Deputación da Coruña, Valentín González Formoso, cualificou a Ángel Carracedo como “un pioneiro, un visionario e un extraordinario divulgador científico que viaxa a través das formas máis ínfimas de vida, no interior das moléculas, para descifrar o que tal vez é o maior misterio da humanidade: que é quen somos, aquilo que James Watson, premio Nobel polo descubrimento da estrutura molecular do ADN definiu como o segredo da vida”.

Formoso sinalou a pandemia da Covid-19 puxo de manifesto a importancia da investigación e da ciencia “como base imprescindible para superar adversidades tan perversas como a que vivimos co virus” e reclamou ás administracións que poñan todos os recursos necesarios ao alcance dos nosos profesionais no campo da medicina, da investigación, da ciencia…pois ese será o instrumento clave para o progreso e o benestar da cidadanía“.

O presidente manifestou a súa satisfacción porque o Otero Pedrayo, o máis lonxevo de Galicia, premie por vez primeira a un persoeiro do mundo da ciencia e subliñou que “ese espírito incansable de procura do coñecemento do que fixo gala Otero Pedrayo ao longo da súa vida é tamén o que hoxe homenaxeamos na persoa de Ángel Carracedo”.

Pola súa banda, o deputado de Cultura, Xurxo Couto aproveitou para lembrar que “cando propuxemos que nesta edición se recoñecese a contribución de Ángel Carracedo á investigación e á ciencia, tiñamos en mente a conveniencia de enxalzar o propio Premio facendo unha lectura o máis ampla posible dos seus obxectivos”. Sobre o premiado asegurou que “Ángel Carracedo non só exemplifica a excelencia nunha carreira científica, senón que tamén é exemplo do traballo realizado desde o país, de confiar nas capacidades e no potencial propio, de poñer a investigación galega no mapa mundial”.

Por último, o deputado de Cultura tamén tivo palabras de agradecemento para “todas as institucións que conforman o xurado do Premio Otero Pedrayo, por ter a sensibilidade e a altura de miras apropiada para introducir na listaxe de gañadores e gañadoras unha área de coñecemento con repercusións directas na vida e no futuro das persoas”.

No acto institucional desta tarde tamén participaron a actriz Neves Rodríguez, quen actuou como mantedora, o secretario xeral de Política Lingüística, Valentín García, e o ex-director dos Museos Científicos da Coruña, Xosé Lois Fraga, que foi o encargado de glosar os méritos do premiado en nome do xurado. A música correu a cargo de Lucía Martiz Dúo. Ademais de representantes do goberno autonómico e das catro deputacións provinciais, tamén asistiron representantes da RAG, do CCG, da AELG, da USC, da UCD, e representantes das corporacións municipais da Coruña, Santiago de Compostela e Santa Comba, entre outras autoridades.

DEIXAR UNHA RESPOSTA

Please enter your comment!
POLÍTICA DE COMENTARIOS:

GCiencia non publicará comentarios ofensivos, que non sexan respectuosos ou que conteñan expresións discriminatorias, difamatorias ou contrarias á lexislación vixente.

GCiencia no publicará comentarios ofensivos, que no sean respetuosos o que contentan expresiones discriminatorias, difamatorias o contrarias a la ley existente.

Please enter your name here

Este sitio emprega Akismet para reducir o spam. Aprende como se procesan os datos dos teus comentarios.