Voar sobre Rande ou a Torre de Hércules: así funciona este simulador de voo con tecnoloxía 3D

As vistas da Ponte de Rande ao achegarse a Vigo dende o aire. Ou a silueta da Torre de Hércules dominando o Atlántico na Coruña. Ata hai pouco, para gozar destas panorámicas facía falta un billete de avión. Agora xa non. O simulador World Flight Sim permite sobrevoar calquera recuncho do planeta grazas aos datos de Google Maps 3D Tiles, ofrecendo unha representación fotorrealista do territorio. Trátase dunha ferramenta gratuíta, accesible dende navegadores como Chrome, Edge, Safari ou Firefox, que xa conquistou a usuarios en cidades tan visitadas como Nova York, París ou Tokio. Pero desta volta, o foco está en Galicia.

A aplicación ofrece a posibilidade de escoller entre tres avións moi distintos: o Cessna 172, ideal para voos tranquilos e contemplativos; o Airbus A320, que recrea a experiencia da aviación comercial; e o F-16, para voos de alta velocidade e manobrabilidade. Ademais, inclúe tres modos de xogo. No Free Flight, o usuario pode explorar libremente calquera cidade cos controis do ordenador. O Career Mode propón unha progresión: comezas cunha avioneta básica e, a medida que acumulas horas de voo sen incidentes, desbloqueas novos destinos e avións. Pola súa banda, o Photo Mode incorpora ferramentas de cámara e filtros para capturar imaxes aéreas de monumentos e paisaxes.

Galicia dende o aire

Dende GCiencia puxemos a proba a opción libre e subimos aos ceos nun Cessna 172 para percorrer Galicia dende outra perspectiva: a Catedral de Santiago, a inmesidade da Terra Chá e as montañas de Ourense. Unha viaxe con tecnoloxía 3D que demostra que, ás veces, abonda cun navegador para cambiar o punto de vista.

Podes acceder a World Flight Sim na seguinte ligazón.