A cuarta e última sesión de Ciencia en feminino aborda os obstáculos aos que se teñen que enfrontar as mulleres científicas ao longo da carreira investigadora. Nesta actividade de GCiencia en colaboración coa Deputación de Pontevedra participan a enxeñeira en telecomunicacións da Universidade de Vigo (UVigo) Soledad Torres Guijarro; a bióloga molecular Iria Gómez Touriño do Centro de Investigación en Medicina Molecular e Enfermidades Crónicas (CiMUS) da Universidade de Santiago (USC); e a enfermeira e investigadora na área de Epidemioloxía da USC Ainara Díaz Geada. A sesión inaugúraa a coordinadora da Área de Igualdade da Deputación de Pontevedra, Sandra Bastos, e condúcea a xornalista de GCiencia Laura Filloy.
O ciclo Ciencia en feminino chega á súa fin tras catro semanas consecutivas de entrevistas e mesas redondas en liña. Emitíronse todos os mércores de marzo ás 19 horas nas canles de GCiencia. O programa arrincou coa inmunóloga África González, que recibiu o Premio María Josefa Wonenburger en 2025. Continuou o 11 de marzo cunha mesa redonda na que participaron Laura Castro, Gloria González e Beatriz Fernández sobre como derrubar os estereotipos que aínda rodean a muller científica. O 18 foi o día de Elena Vázquez Abal, matemática e divulgadora. Xa podes ver e escoitar todas as entrevistas na canle de Youtube de GCiencia ou nas nosas plataformas de pódcast.
