A segunda sesión de Ciencia en feminino contará coa participación das investigadoras galegas Laura Castro Souto, Gloria González Fortes e Beatriz Fernández Domínguez, que intervirán nunha mesa redonda sobre centrada en como derrubar os estereotipos que aínda pesan sobre a muller científica. Para iso, reuniranse unha experta en intelixencia artificial, unha paleontóloga e unha física, respectivamente, tres disciplinas tradicionalmente masculinizadas nas que a presenza feminina continúa a ser minoritaria. Durante a conversa abordarán cuestións como a presenza de referentes na súa infancia, a imaxe social da muller científica, os seus inicios na investigación, as dificultades de conciliación e os retos que presenta a intelixencia artificial na perpetuación de estereotipos de xénero.
Ciencia en feminino celebrará as restantes sesións os mércores do mes de marzo ás 19 horas. A seguinte sesión, o 18 de marzo, convida a catedrática de Matemáticas da Universidade de Santiago (USC) Elena Vázquez Abal, unha figura de recoñecido prestixio no eido da divulgación. O ciclo pecharase o día 25 da man das investigadoras Soledad Torres, Iria Gómez e Ainara Díaz, coas que se abordarán os principais obstáculos da carreira investigadora para as mulleres.
