O Instituto Geográfico Nacional publicou na rede un vídeo no que se resume, de forma cronolóxica, a actividade sísmica detectada pola súa rede durante o ano 2018 que terminou hai uns días. E Galicia aparece como unha das zonas con maior cantidade de sismos, xunto ao sur da península Ibérica (zona de encontro das placas euroasiática e africana), os Pireneos e Canarias (pola súa natureza volcánica).
Os mesmos datos do IGN recollen que en Galicia e o seu litoral houbo arredor de 120 sismos con magnitude superior a 2. O maior deles, que acadou unha magnitude de 3,7 e unha intensidade IV (que calcula os efectos nos edificios e obxectos e na natureza), tivo lugar o 17 de novembro en Melgaço (Portugal) pero moi preto da fronteira, e percibiuse en centos de puntos do sur de Galicia, co que o IGN rexistrou unha gran cantidade de avisos.
Tamén superaron a magnitude 3, e foron sentidos pola poboación, os sismos de Taboada (21 de agosto; 3,5), Sarreaus (14 de outubro; 3,3), Meira (21 de setembro; 3,1), Triacastela (2 de agosto; 3,0) e dous sismos en Ponte Caldelas, os días 15 e 17 de maio, con magnitudes 3,1 e 3,2, respectivamente.
Arredor deste municipio pontevedrés produciuse un dos fenómenos que máis chamou a atención neste ano en Galicia. Un enxame sísmico con decenas de pequenos movementos (algúns nin sequera superaron a magnitude 2) notáronse durante días nesta zona. Outro sismo bastante sentido (pola densidade de poboación da zona) foi o de Oleiros, en febreiro, cunha magnitude de 2,9.
No conxunto da península, o sismo máis forte foi o rexistrado o 15 de xaneiro en Arraiolos, no Alentejo portugués, cunha serie de réplicas percibidas claramente pola poboación. Menor magnitude, por exemplo, ca o recordado sismo de maio de 1997 en Lugo, que acadou 5,1, e xerou gran inquedanza en toda Galicia.
