Luns 4 Marzo 2024

Enxame sísmico: así é o fenómeno dos terremotos en Pontevedra

Estase a producir un enxame sísmico en Galicia. Así o explica a GCiencia Emilio Carreño, director da Rede Sísmica do Instituto Geográfico Nacional. A sucesión de terremotos, a maioría deles cunha magnitude superior a 2, que se rexistran desde o martes no interior da comarca de Pontevedra “poderíase clasificar” dentro deste tipo de fenómenos asociados ao movemento continuo e ‘habitual’ das placas tectónicas.

Defínese como enxame sísmico a sucesión de tremores que se producen nun área concreta durante un período determinado de tempo. Poden durar horas, días ou meses, e destácanse, tal e como sinala Emilio Carreño, porque “non existe un sismo que poidamos chamar principal“.

Publicidade

O fenómeno do enxame sísmico adoita producirse con certa periodicidade en Galicia, aínda que a súa intensidade non chega a ser percibida en moitos casos pola poboación. Con todo, hai experiencias recentes de situacións de risco. Foi, por exemplo, o que aconteceu a mediados dos anos 90 no bautizado como ‘triángulo sísmico’, entre as localidades lucenses de Sarria, Becerreá e Triacastela. Centos de tremores de magnitude superior a 3 sucedéronse durante meses. O evento principal produciuse o 21 de maio de 1997, cun tremor de magnitude 5,1 que se sentiu en toda Galicia.

Falla activa na zona do enxame

Tal e como sinalaba tamén a GCiencia o xeólogo Vidal Romaní, e se pode ver na imaxe baixo este parágrafo, hai unha pequena falla activa baixo a zona da provincia de Pontevedra onde se están a producir os sismos. O rexistros históricos tamén dan conta, segundo amosa o mesmo gráfico, da existencia de sucesos semellantes no pasado.

Pequena falla activa na zona do enxame sísmico (en vermello) e datos históricos de sismicidade na zona. Fonte: Juan Ramón Vidal Romaní.
Pequena falla activa na zona do enxame sísmico (en vermello) e datos históricos de sismicidade na zona. Fonte: Juan Ramón Vidal Romaní.

Con todo, non cabería agardar grandes terremotos na zona. “Segundo o ficheiro de fallas activas do IGME – explica Emilio Carreño – non hai na zona ningunha recoñecida como tal. Porén, é certo que en Galicia, en xeral, parece que a sismicidade é debida a multitude de pequenas fallas que, debido á súa curta lonxitude de traza, en principio non teñen por que orixinar terremotos de grandes magnitudes”.

Con todo, e coas debidas precaucións, Vidal Romaní, apunta que poderiamos estar a falar dun episodio “algo máis serio”, xa que “hai unha maior variedade de profundidade nos hipocentros”, o que “podería interpretarse como un síntoma que vai máis aló dun simple reaxuste“, xa que as características dos sismos “parecen indicar un movemento xeral en toda a falla”.

DEIXAR UNHA RESPOSTA

Please enter your comment!
Please enter your name here

Este sitio emprega Akismet para reducir o spam. Aprende como se procesan os datos dos teus comentarios.

Relacionadas

Canto cambiou a rúa na que vives nos últimos 60 anos? Compróbao neste mapa

Un mapa do Instituto Xeográfico Nacional permite comparar imaxes aéreas captadas nos anos 50 con ortofotos actuais

Estes foron os terremotos máis intensos rexistrados en Galicia

O de Triacastela en 1997 foi o de maior magnitude, pero os que máis danos causaron foron os de Ferrol en 1910 e o de Pontevedra en 1920

Así cambiaron as catro capitais galegas nos últimos 100 anos

O Instituto Geográfico Nacional compila mapas históricos do país grazas a "España Regional", un atlas publicado en 1910

A falta de estacións sísmicas impide detectar máis terremotos na costa de Galicia

Un equipo da Universidad de Oviedo publicou un traballo que aborda o papel da falla Cantábrica nos sismos fronte a cabo Ortegal