O Instituto Xeográfico Nacional (IGN) informaba esta madrugada sobre o sucedido nas costas do sur de Portugal. Un sismo de magnitude 5,5 na escala de Richter impactou ás 5:11 hora local (6:11 hora española), facéndose sentir en toda a península ibérica occidental, dende Andalucía ata Asturias, pasando por Galicia.
O seu epicentro, localizado no Atlántico, situouse preto da capital de Portugal, Lisboa. O terremoto caracterizouse por unha profundidade de 19 quilómetros, segundo informa o organismo a través da súa páxina web. A pesar da magnitude, non se produciron danos materiais nin persoais.
Isto fai volver á vista atrás. O xeólogo Antonio Aretxabala lembraba a través do seu perfil de X o que ocorreu na mesma cidade portuguesa o 1 de novembro de 1755. Tratouse da catástrofe máis enérxica vivida na península, que acadou a Intensidade X na escala de Mercalli, un potencial de destrución moi elevado.
Os efectos do sismo
Galicia atopouse entre as numerosas localizacións que percibiron este movemento sísmico. Aínda que os efectos se notaron nas provincias de Lugo, A Coruña e Pontevedra, esta última foi a máis “afectada”, como amosa a listaxe facilitada polo IGN. Foron 35 concellos pontevedreses os que puideron percibilo, oscilando entre os grados II e III. Aínda que a maioría corresponden ao primeiro mencionado, algunas zonas chegaron a percibir o terremoto de forma máis notoria.
No grado III, segundo o IGN, o terremoto síntese dentro de edificios, onde as persoas en repouso perciben un lixeiro temblor e os obxectos colgados móvense levemente, sen producir danos. As zonas concretas onde se viviu o suceso deste xeito foron na Areosa (Gondomar), Arcade (Soutomaior), na Avenida de Ordóñez (Tomiño), Lavadores (Vigo), Ponteareas (San Miguel) e Setados (As Neves). Na Coruña, en Ribeira (Santa Uxía).
Así, na provincia do noroeste galego faise evidente tamén a repercusión. Os vestixios chegaron tamén a Santiago de Compostela, Ames, Boiro, Muros ou Noia. Incluso acadaron puntos máis ao norte, como a cidade da Coruña, Cambre, Ferrol, Oleiros ou Narón. Segundo o organismo nacional, tamén se sentiu na cidade de Lugo, cun grado II. Usuarios como Francisco Morán, habitante de Boiro, confirmaron a notoriedade do sismo nos seus fogares.
A raíz da noticia, o Euro-Mediterranean Seismological Centre (EMSC) compartía un mapa interactivo da península onde os visitantes poden visualizar os datos sobre a intensidade e os danos causados polo terremoto portugués en diferentes localizacións, incluída Galicia.
