Meses despois da chegada dos pellets froito da vertedura do buque Toconao ás costas de Galicia, a organización Noia Limpa denuncia outro episodio de contaminación, o cal está a afectar, maioritariamente, ás praias da Mariña lucense: trátase de pequenas bólas de chapapote, cuxa orixe aínda é descoñecida polas autoridades.
O primeiro avistamento do fuel deuse fai días na praia de A Marosa, no Concello de Burela. A Asociación A Mariña sen Plástico amosaba nun vídeo na súa rede social de Instagram unha grande cantidade de pequenas bólas de alcatrán. Dende a publicación, a Asociación preguntaba pola situación doutras praias da mariña, e outros usuarios aproveitaron para denunciar a mesma imaxe nos concellos de Ribadeo e Foz. O colectivo tamén organizou unha acción de voluntariado para recoller o fuel na mesma praia de Burela. Días despois, a aparición de chapapote chegou mesmo a outras rexións máis afastadas como Cariño e Valdoviño.
Dende Noia Limpa subliñan que as bólas de chapapote son difíciles de ver, polo que en moitas ocasións a xente que vai á praia non é consciente da súa presenza ata que, ao chegar a casa, decátanse de que as levan nos pés.
Sen culpábeis, polo de agora
Ademais, a organización chama a acción cidadá á hora de notificar o chapapote en calquera outra praia avisando ao 112 e as socorristas. Aínda que inicialmente a vertedura apareceu na costa de provincia de Lugo, o fuel está presente xa nas tres provincias galegas con mar. O maior número de alertas por avistamento destas bólas de chapapote deuse na rexión asturiana de Navia, mais aínda se descoñece a orixe do incidente.
Salvamento Marítimo anuncia que está a investigar o que semellan ser hidrocarburos moi degradados. As imaxes dos satélites non alertaron ningunha detección da vertedura, e tampouco hai constancia de ningunha descarga, nin operacional nin accidental.
