A Coordinadora para o Estudo dos Mamíferos Mariños (CEMMA) vén de devolver ao océano dúas tartarugas mariñas comúns (Caretta caretta), Mozarrón e Pega, despois de que completaran a súa rehabilitación. O CEMMA conta que estes animais chegaran ás súas mans desnutridos e con moito frío: “No outono e, sobre todo, no inverno baixa a temperatura da auga. Como son réptiles, quedan en letargo e son arrastradas polas correntes ata nós”.
A ONG galega explica que unha ampla maioría das tartarugas que chegan ás costas galegas veñen con plásticos. Sinalan que, durante os primeiros días, as tartarugas desfanse deses materiais a través das súas feces e despois dese “détox” inicial van ao centro veterinario. “Aínda que case todas nos veñen con plásticos, o motivo polo que varan son as malas condicións de nutrición que experimentan polo letargo do frío”, aclaran na CEMMA.
Sobre o proceso de rehabilitación, os membros da coordinadora levan os espécimes a Nigrán, onde reciben calor e comida. “Dámoslles auga de entre 18 e 20 graos, que é o que prefiren”, indica a organización. Explican que como fase final poñen un microchip que poida identificar cada individuo. Así, sinalan, se volven ás nosas costas ou chegan a outras, poderá saberse de onde veñen. No caso de Mozarrón e Pega non incluíron un dispositivo localizador, polo que de aquí en adiante non poderán seguirlles a pista por vía satelital.
Como recoñecer unha Caretta caretta?
A CEMMA explica que as tartarugas comúns, as máis abundantes nas costas galegas, son de cor marrón e poden identificarse segundo as escamas —en concreto, a súa posición— que teñen na cuncha. Ademais, teñen catro placas prefrontais na cabeza e contan con dúas unllas nas aletas dianteiras, mentres que outras especies teñen tan só unha.
