27 vacas faleceron este domingo tras o impacto dun raio nunha explotación gandeira situada en Santa Mariña de Pescoso, no concello de Rodeiro. A caída deste nun transformador eléctrico provocou a morte do 90% dos animais, segundo informou Suso Montes, presidente da cooperativa O Rodo.
A dona, que non sufriu danos persoais, conducía un rabaño de 30 reses cando ocorreron os sucesos. A muller estaba na parte de atrás e sentiu unha especie de explosión. A humidade do terreo facilitou a condución da electricidade, o que provocou que a manda morrese practicamente no acto. Aínda que este tipo de incidentes non son moi habituais, tampouco son estraños no medio rural. Con todo, é pouco frecuente que teñan consecuencias tan tráxicas. A dona dos animais tiña un seguro, polo que é probable que lle devolvan parte (aínda que non todo) das perdas.
