Case un mes despois de acadar o fito de pousar a sonda ‘Tianwen‘ (que podería traducirse como ‘preguntas ao ceo’), a misión da China en Marte continúa o seu camiño e remite novas imaxes á Terra. Esta semana, a Administración Espacial Nacional chinesa (CNSA) difundía un autorretrato da sonda e o vehículo ‘Zhurong‘ (nome do deus do lume) co que explorarán a zona da Utopia Planitia.
O autorretrato realizouse a través dunha cámara sen fíos situada nun primeiro momento no ‘Zhurong’. Despois do lanzamento en xullo de 2020 e a chegada á superficie do planeta, o 15 de maio, o ‘rover’ descendeu da plataforma de amartizaxe para comezar a exploración do planeta. Desde entón, o vehículo estivo recollendo informacións sobre as condicións ambientais, tomando fotografías en tres dimensións de alta resolución e analizando os materiais da superficie, o subsolo e o campo magnético marcianos. China converteuse así, despois dos Estados Unidos, no segundo país en levar con éxito un robot ao planeta vermello.
A galería recolle, ademais do autorretrato, unha panorámica dos arredores da zona de Utopia Planitia onde se sitúan os dous aparellos. É unha área relativamente cha, con algunhas rochas de diferentes tamaños e algunhas dunas no horizonte. Tamén se pode observar noutra imaxe á ‘Tianwen’ xunto ás pegadas das rodas de ‘Zhurong’.
A exploración da superficie marciana supón un novo fito para a CNSA, que en 2019 conseguiu levar por primeira vez un vehículo na cara oculta da Lúa, o Chang’e 4.
