Máis de medio cento de falsos percebes ás súas costas. Así atoparon a esta tartaruga común (Caretta caretta) os traballadores da Coordinadora para os Estudos dos Mamíferos Mariños (Cemma). O animal apareceu en Fisterra e a entidade liberouna da “pesada carga” formada por un total de 59 cirrípedos na súa coiraza. Trátanse de exemplares de Lepas anatífera, unha especie “que se asemella moito aos seus curmáns e por iso tamén se lles coñece como falsos percebes”, detalla o persoal do Cemma.
Nesta ocasión, os cirrípedos “eran o 60% do peso da tartaruga, pero tivemos outros casos nos que superaban o peso do animal”, explican. Por este motivo nomeárona ‘Percebeira’. “O animal non sufriu ningún dano na súa coiraza”, aseguran dende o Cemma.
“É normal que estes falsos percebes se peguen a todo tipo de obxectos, non só aos animais mariños”. Por iso, o Cemma compartía tamén outra sorprendente imaxe dun grupo de cirrípedos viaxando nunha lámpada. O obxecto tamén apareceu en Fisterra, concretamente na praia Mar de Fóra.
