Unha impactante imaxe que reflicte a marca da humanidade no mundo animal. A asociación sen ánimo de lucro para a investigación do medio mariño, Bottlenose Dolphin Research Institute (BDRI), vén de publicar unha fotografía na que se pode ver un arroaz (Tursiops truncatus) cunha serie de cicatrices brancas nun costado. Trátase dunha instantánea que mostra as secuelas físicas xa curadas do cetáceo após un encontro cunha hélice de barco titulada. “Un sobrevivente nas nosas augas”, segundo o título da imaxe.
Na fotografía móstrase un exemplar de arroaz con catro cicatrices brancas saltando sobre as augas da costa galega, concretamente na ría de Arousa. As marcas, que mostran unha separación moi semellante entre unha e outra, foron feitas por unha hélice dun barco. “Vese moi claro polo padrón que mostran as feridas, de maior a menor profundidade e o espazo entre cada unha”, explica Bruno Díaz, científico e fundador do BDRI, que ten sede no Grove. “As hélices teñen tres aspas e cando os cetáceos que non están acostumados se atopan con estas estruturas, tenden a mergullarse, de aí que se poidan producir estes accidentes e os animais acaben feridos”, matiza.
Na maioría dos casos, segundo sinala o experto, os animais curan sen problema estas feridas pola súa conta. “Dáse un número maior de exemplares con marcas nas zonas de augas abertas, lonxe das costas, evidentemente porque os animais están máis expostos ao tráfico de grandes embarcacións”, comenta Díaz. Do mesmo xeito, os cetáceos que tenden a moverse preto das costas “están máis acostumados á presenza de barcos e a incidencia non é tan alta”, conclúe.
