Un terremoto de magnitude 3, un dos máis fortes dos últimos anos na provincia da Coruña, rexistrouse ás 23.18 horas deste mércores con epicentro no municipio de Tordoia, moi preto do núcleo da Pontepedra e o encoro de Vilagudín, segundo confirmou o Instituto Geográfico Nacional (IGN) a través da súa rede de información sísmica. Nun primeiro momento, o IGN situou o epicentro preto da confluencia dos municipios de Carballo, A Laracha e Cerceda, e atribuílle unha magnitude de 3,4, que foi recalculada posteriormente en 3.
#terremoto 03/06/2020 21:18:09UTC NE TORDOIA.C mag=3.0 prof=4km cálculo revisado https://t.co/d2A8p3qU3s
— IGN Sismologia (@IGN_Sismologia) June 3, 2020
O tremor percibiuse claramente en cidades como A Coruña e Santiago, e vilas de boa parte da provincia, e xerou numerosos comentarios nas redes sociais. Como adoita acontecer nestes casos, o IGN puxo a disposición das persoas que sentiron o tremor un cuestionario para medir a intensidade do sismo. En poucas horas recibíronse centos de respostas que situaron a escala de intensidade no nivel III e mesmo IV nalgúns casos, que se corresponde cos sismos percibidos dentro dos edificios por moitas persoas, e por moi poucos no exterior, e nalgúns casos chega a causar un pequeno tremor en vivendas, oscilacións en obxectos pendurados e vibracións en vaixelas, cristalerías, ventás e portas.
Así o viviron algunhas persoas:
Meu acabo de vivir un terremoto k pasada temblaron as fiestras e o chan https://t.co/vyAKJWT6bC
— Noelia Moreau (@slimshadynoelia) June 3, 2020
Se mañán me din que hai unha invasión alieníxena é que nin me sorprendo. https://t.co/LmKTCu2s9W
— Nerea (@nerea_ci) June 3, 2020
E eu digo: joooooder co veciño outra vez prendendo o tractor ás doce da noite 😂😂😂😂 https://t.co/7mCcVZvKZw
— Luz Cures Vázquez🐗 (@LuzCures) June 3, 2020
Antecedentes
Hai só 15 días, a provincia coruñesa rexistraba outro dos sismos máis potentes dos últimos anos, tamén con magnitude 3, e non lonxe do deste mércores en Tordoia. O epicentro foi na localidade de Frades, e xerou tamén decenas de avisos. En agosto do ano pasado, un sismo en Celanova acadou a magnitude 3,4. E en novembro de 2018, un sismo de 3,8 en Melgaço, ao outro lado da raia do Miño, xerou unha importante expectación en todo o sur de Galicia con rexistros de ata intensidade IV. Os sismólogos distinguen a escala de magnitude, como Richter ou a mbLg, usada na península Ibérica, das escalas de intensidade, que serven para clasificar un sismo en función dos seus efectos nas persoas, nos edificios e obxectos e na natureza.
Ordes e Bergantiños, dúas comarcas con actividade sísmica intermitente
Galicia é unha das zonas de maior actividade sísmica da península Ibérica xunto aos Pireneos, Andalucía e o Levante, que se atopan en bordos de placas que provocan de forma habitual tremores con magnitude superior a 4. Con todo, son menos potentes cós doutras partes do planeta nos que conviven con sismos moito máis fortes e perigosos.
No caso de Galicia, un dos sismos máis lembrados foi o do 21 de maio de 1997, con epicentro no coñecido como triángulo sísmico de Sarria, Triacastela e Becerreá, e que espertou a boa parte do país ao acadar unha magnitude de 5,1.