Imaxe do mapa de restricións en vigor a partir do venres, e unha reunión recente do comité clínico. Foto: Xunta de Galicia/elaboración propia.
Imaxe do mapa de restricións en vigor a partir do venres, e unha reunión recente do comité clínico. Foto: Xunta de Galicia/elaboración propia.

A transmisión da Covid-19 leva a Sanidade a manter restricións en case 40 concellos

Vigo pasa a nivel medio xunto a 19 concellos, outros 14 fican en nivel alto e O Grove, A Pobra do Caramiñal, Carballeda de Valdeorras e Cualedro, en máximo

A consellería de Sanidade anunciou no serán deste martes, despois da reunión do comité clínico que asesora á Xunta de Galicia na xestión da pandemia da Covid-19, que 38 concellos dos 313 que hai en Galicia manterán a partir do venres un maior nivel de restricións por mor da transmisión do coronavirus SARS-CoV-2. O aumento da incidencia na contorna da ría de Arousa e na área de Vigo, ademais dos casos detectados no suroeste da provincia de Ourense e Valdeorras, entre outras comarcas, concentra os municipios afectados por estas limitacións, que entrarán en vigor na medianoite do xoves 22 ao venres 23 de abril.

Non hai novidades nos concellos en nivel máximo, no que seguirá vixente o peche perimetral, a clausura da hostalaría e a prohibición das reunións con persoas non conviventes. Nesta situación atópanse O Grove, A Pobra do Caramiñal, Carballeda de Valdeorras e Cualedro.

O comité clínico estableceu que ficarán no nivel alto de restricións os concellos de Marín, Meaño, Ribadumia, Vilanova de Arousa, Padrenda, Cortegada, O Barco, Rubiá, Lobeira, Muiños, Petín, Meira, Ribeira e Cambre. Isto supón o peche do interior dos locais da hostalaría e a capacidade máxima do 50% no exterior, ademais doutra serie de medidas contempladas na normativa que entrou en vigor despois dos novos pasos na ‘desescalada’ (máis información aquí).

No nivel medio destaca a cidade de Vigo, na  que se está a constatar un aumento da transmisión nos últimos días, incluíndo surtos vinculados ás variantes P.1 e P.2 do virus. Xunto a Vigo estarán neste rango de limitacións os concellos de Trabada, Barreiros, Lobios, Cartelle, Cambados, Catoira, Vilagarcía de Arousa, A Illa, Meis, Sanxenxo, Cangas, Gondomar, Ponteareas, Boiro, Rianxo, Carral, Muxía, As Pontes de García Rodríguez e Ortigueira. Neles, os establecementos de hostalaría só poderán abrir ao 30% no interior e 50% no exterior.

O resto de concellos galegos (275), quedan no nivel medio-baixo. Neles, a hostalaría poderá ter un 50% de capacidade no interior e 75% no exterior. Ademais, por norma xeral mantense a limitación de reunións a catro persoas en interiores e seis en exteriores, o confinamento nocturno entre as 23 e as 6 horas e o peche perimetral da comunidade autónoma.

Este mércores, como todas as semanas, responsables da consellería de Sanidade analizarán a evolución da pandemia nunha comparecencia de prensa. Segundo os últimos datos do Ministerio de Sanidad, a incidencia mantense en Galicia nos 90,35 casos/100000 habitantes a 14 días e de 44,9 a sete días, estabilizándose despois de varias xornadas de lixeiras repuntas.

DEIXAR UNHA RESPOSTA

Please enter your comment!
POLÍTICA DE COMENTARIOS:

GCiencia non publicará comentarios ofensivos, que non sexan respectuosos ou que conteñan expresións discriminatorias, difamatorias ou contrarias á lexislación vixente.

GCiencia no publicará comentarios ofensivos, que no sean respetuosos o que contentan expresiones discriminatorias, difamatorias o contrarias a la ley existente.

Please enter your name here

Este sitio emprega Akismet para reducir o spam. Aprende como se procesan os datos dos teus comentarios.