Aínda que Meteogalicia prevé ceos cubertos durante os vindeiros días, algunhas noites haberá pequenas treguas entre as nubes apara contemplar una das grandes choivas de estrelas do ano. Porque durante a segunda quincena de abril temos unha cita coas Líridas, cando o noso planeta atravesa a nube de partículas que deixou fai máis dun século un cometa. O seu máximo será a noite deste mércores 21 ao xoves 22 e, con paciencia, poderase ver algunha cruzando o ceo cada 10 ou 15 minutos.
A choiva de estrelas das Líridas, que semellan proceder da constelación da Lira, pódese observar habitualmente cada ano entre o 16 e 26 de abril. Os cometas, na súa órbita arredor do Sol, deixan ao seu paso un ronsel de xeo, po e rocas. A Terra, no seu percorrido anual arredor da estrela, cruza estas nubes de pequenas partículas, chamadas meteoroides. Cando estes atravesan a atmosfera terrestre, aparece unha intensa fricción que orixina os espectaculares ronseis luminosos que vemos sucando o ceo.
O rastro dun cometa que pasou en 1861
Durante estes días, estamos a atravesar a nube de partículas que o cometa Thatcher (C/1861 G1) deixou tras de si na súa última visita ao perigeo terrestre, en 1861.
Aínda que é posible que desde mediados ata finais de abril vexamos algún destes meteoros desintegrarse na atmosfera, o máximo da choiva de estrelas terá lugar a noite do 21 ao 22 de abril, a partir das 23:00 horas.
As choivas de meteoros reciben os seus nomes da constelación da que semella que emanan. As Líridas chámanse así porque o seu radiante (o punto do que parecen proceder) atópase na constelación da Lira, que poderemos identificar porque contén á estrela Vega, unha das máis brillantes do ceo nocturno.
Como curiosidade, na película Contact, o sinal extraterrestre que recibe o personaxe interpretado por Jodie Foster provén desde esa brillante estrela. Pero non será necesario que miremos cara a ela para ter a oportunidade de pedir desexos. Abondará con que fixemos a nosa vista nun punto calquera do firmamento e esperemos, pacientemente uns minutos.
Ao longo do ano pode haber ata 50 choivas de meteoros (escintileos de luz que emiten a partículas ou meteoroides), pero as máis significativas son as Cuadrántidas, as Perseidas e as Xemínidas.
