Este mércores 3 de outubro póñense á venda os paquetes de turismo científico que impulsa o proxecto Mar de Ciencia. Desde o vindeiro día 12, poderase disfrutar de estancias de 1, 2 ou 3 días nas Illas Atlánticas, da man de expertos en diversas disciplinas, para coñecer en profundidade a natureza e a paisaxe do arquipélago que conforman Cíes, Ons, Sálvora e Cortegada.
Durante a viaxe desde a Costa ata as Illas insistirase no avistamento de aves e cetáceos, o coñecemento das furnas mariñas e outras actividades de exploración no ecosistema mariño. Do mesmo xeito, aproveitarase a noite para facer observacións astronómicas, xa que as Illas Atlánticas están tamén acreditadas co destino Starlight, que recoñece aos ceos limpos de contaminación luminosa.
Os paquetes de Mar de Ciencia inclúen tamén un ‘kit’ de explorador, con comida especialmente preparada para facer unha merenda científica, ben nas Illas ou no mar. Do mesmo xeito, tamén se inclúen lugares específicos para pasar a noite, ben en cámpings, como en hoteis ou casas rurais.
Toda a iniciativa enmárcase dentro da idea de turismo sostible que impulsa Observer Science Tourism, entidade que acreditou ás Illas Atlánticas no pasado ano co selo de destino de turismo científico. Terase en conta que “un maior coñecemento dos recursos naturais implica sempre unha mellor conservación“. Deste xeito, nas viaxes de Mar de Ciencia vaise remarcar tamén a importancia da redución de residuos, a reciclaxe e o coidado do medio ambiente.
O proxecto presentouse o pasado venres no edificio Cambón de Vigo. Na iniciativa participan, ademáis de Observer e Habitaq, Cies.gal, Vioviajes, Wireless Galicia e Luzlux. Mar de Ciencia está cofinanciado pola Xunta de Galicia, o Muinisterio de Agricultura, Alimentación e Medio Ambiente e os fondos Feader da Unión Europea.
Máis información na páxina web de Mar de Ciencia.
