A conselleira de Medio Ambiente e Ordenación do Territorio, Beatriz Mato, anunciou onte que o Parque Nacional das Illas Atlánticas converteuse no primeiro destino de turismo científico de Galicia. O parque recibiu o selo Observer, unha distinción que recoñece aos enclaves turísticos con especial importancia científica, e que está impulsada por unha empresa de base tecnolóxica nacida na USC. Nela tamén colaboran as universidades de Vigo e A Coruña e outras entidades de divulgación científica.
Segundo explicou Mato, as Reservas Científicas Observer son espazos naturais protexidos, de excepcionais características e valores, cuxa riqueza natural e singularidades convértenas en espazos únicos nos que xa se veñen desenvolvendo actividades científicas, non só de carácter turístico senón tamén de investigación.
Desde a consellería de Medio Ambiente sinalan que a Dirección Xeral de Patrimonio Natural traballa para que a finais de 2018 se poida conseguir este selo para os os seis parques naturais galegos (Dunas de Corrubedo, Baixa Limia e Serra do Xurés, Fragas do Eume, Monte Aloia, O Invernadeiro e Enciña da Lastra).
