O etileno, un precursor do plástico, é un compoñente fundamental da industria química. Porén, a actual produción insostible deste composto xera grandes emisións de CO2. A procura dunha alternativa ecolóxica aos métodos baseados en combustibles fósiles é o principal obxectivo co que se puxo en marcha o proxecto europeo MemCat (Síntese de etileno asistida por membrana sobre catalizadores tándem nanoestructurados), do que forma parte o Centro de Investigación en Nanomateriais e Biomedicina (CINBIO) da Universidade de Vigo.
MemCat arrancou o pasado mes de maio e, cunha duración de 48 meses, prolongarase ata finais de abril de 2028, formando parte do consorcio a University of Jyväskylä (Finlandia), Eindhoven University of Technology (Países Baixos), The Max Planck Society (Alemaña), a University of Calabria (Italia) e a entidade 1 CUBE BV (Países Baixos). A Universidade de Vigo, a través do CINBIO, é a única participante española con Laura Salonen —do grupo de Nanomateriais Híbridos— como investigadora principal.
Obxectivos principais do proxecto
O proxecto MemCat ten como principal obxectivo acadar unha innovación revolucionaria que permita a síntese de etileno directamente a partir de CO2 empregando catalizadores tándem nun reactor de membrana, proporcionando así unha alternativa ecolóxica aos métodos baseados en combustibles fósiles. O desenvolvemento de catalizadores, o estudo dos procesos catalíticos mediante métodos computacionais e experimentais, o desenvolvemento de membranas de nanocompostos ou a construción dun prototipo do reactor de membrana, son algunhas das tarefas que levarán a cabo os sete socios do proxecto para acadar o seu ambicioso obxectivo, coa perspectiva de, a longo prazo, poder facilitar o acceso a polímeros verdes proporcionando precursores plásticos con carbono negativo, empregando CO2 antropoxénico e hidróxeno verde.
O equipo do CINBIO está formado pola investigadora Laura Salonen, o investigador posdoutoral Balkaran Singh Sran e o estudante de doutoramento Mohammad Izad Panah Ostad. Encárganse do deseño e a síntese de nanomateriais para as membranas de nanocompostos. Isto, en palabras da investigadora principal, “permitirá a separación eficiente de etileno doutras moléculas segundo o seu tamaño, de forma que este produto poida obterse con alta pureza”. Esta tarefa levarase a cabo en estreita colaboración co equipo da University of Calabria, que desenvolverá as membranas de nanocompostos, e co equipo da Eindhoven University of Technology, que está a desenvolver o reactor de membrana.
Produción sustentable
O proxecto MemCat conta cun equipo altamente interdisciplinar, formado por expertas e expertos nos campos do desenvolvemento dos nanomateriais, a catálise ou a química computacional, así como do desenvolvemento de membranas e reactores de membrana. “Formar parte deste equipo é unha grande oportunidade”, comenta Salonen, quen subliña a gran motivación que supón “traballar no apaixonante obxectivo de crear unha nova tecnoloxía que permitirá a produción sustentable de compostos químicos básicos”.
A iniciativa é financiada integramente pola Unión Europea a través da convocatoria EIC Pathfinder Open para o programa Horizonte Europa e coordinada polo International Iberian Nanotechnology Laboratory (INL), de Braga (Portugal). Completan o consorcio as outras seis institucións mencionadas, entre as que se atopa a Universidade de Vigo e, máis concretamente, o seu Centro de Investigación en Nanomateriais e Biomedicina, CINBIO. Conta cun orzamento de 340.625 euros.
Podes ler a noticia do DUVI na seguinte ligazón.
