No mundo científico, nada é sinxelo. O tempo, os recursos, todo debe aproveitarse ao máximo para poder traballar en melloras que acaban repercutindo na vida da xente. Por iso, as ferramentas que simplifican e fan máis sinxelo procedementos tan complexos, poden cambialo todo. CYCLOPS encarna ese espírito. O Centro Singular de Investigación en Química Biolóxica e Materiais Moleculares (CiQUS) vén de presentar cun estudo esta plataforma, que permite coñecer mellor os ciclopéptidos, que son a base de novas liñas de antibióticos.
A resistencia antibiótica é un dos grandes desafíos que está a afrontar a medicina moderna. Por exemplo, algunhas cepas de gonorrea están a ter unha maior capacidade de soportar algúns tratamentos. Isto significa que enfermidades que poderían estar xa controladas e que se poden evitar con medicamentos, volven cobrar importancia e perigo.
Agora, unha plataforma creada polo CiQUS e liderada polo químico galego Alberto Cabezón e polo físico Fabián Suárez, poderá mellorar a accesibilidade e a rapidez coa que se fan estas investigacións. “Ferramentas con efectividade hai máis”, explica Cabezón, pero o punto forte de CYCLOPS é que é moito máis sinxelo de usar. “Se non tes formación para utilizar os códigos, está a páxina web, que é bastante intuitiva”, asegura o químico.
Normalmente, os procesos para traballar con ciclopéptidos son moi longos. Isto é porque a súa efectividade e permeabilidade depende de moitos factores. Principalmente, dos aminoácidos que a conforman. Esta ferramenta permite tamén, desta forma, aforrar en recursos e tempo. Agora, está ao acceso dun clic para o resto de expertos.
Por que son claves os ciclopéptidos?
Os ciclopéptidos son moléculas formadas por aminoácidos que están moi presentes na natureza de diversas formas. O seu estudo en laboratorios é moi útil para poder crear tratamentos, como a Bacitracina, un antibiótico trópico. Unha das vantaxes deste tipo de péptidos, é a súa capacidade para prolongar a súa existencia cando se atopan no corpo. Posto que é un compoñente natural, as persoas (e outros animais e organismos) teñen fórmulas para degradar eses compostos. Cando se conforman de forma cíclica, poden aguantar máis e manter a súa actividade biolóxica (como pode ser, recoñecer e atacar de forma selectiva a unha bacteria).
O punto máis importante e no que se basea gran parte da utilidade destes, é a súa capacidade para detectar certas membranas (por exemplo, dun axente infeccioso), e atacalas. Por iso, é moi importante coñecer se son capaces de chegar a esa superficie. É dicir, se teñen permeabilidade. E iso é do que se encarga de medir a ferramenta do CiQUS, que utiliza tecnoloxía de aprendizaxe automática.
A orixe de CYCLOPS parte da dificultade de uso doutras bases de datos. “Algúns dos nosos colaboradores e expertos non foron capaces de usar os modelos publicados (anteriormente) para obter resultados”, explica Cabezón. Agora, calquera científico poderá introducir unha ou varias secuencias de aminoácidos e obter os resultados en apenas segundos.
