Theia é un corpo celeste hipotético que, segundo a teoría do gran impacto, chocaría coa Terra fai 4.500 millóns de anos e, dos materiais que saíron desta colisión, formouse a Lúa e empezou a virar ao redor do noso planeta.
A orixe de Theia é un misterio, pero agora, un estudo internacional liderado pola Universidade de Chicago (EEUU) e o Instituto Max-Planck (Alemaña), revela algunhas pistas.
Segundo a investigación, publicada en Science, este xigante planetario formouse no sistema solar interior, e probablemente máis preto do Sol do que se formou a Terra.
Pegadas isotópicas
O grupo científico analizou rocas lunares e terrestres e examinou as pegadas isotópicas do ferro na súa composición, é dicir, as diferentes versións do ferro segundo o seu número de protóns e neutróns.
“Utilizamos análise de alta precisión de isótopos de ferro de mostras da Lúa recollidas polas misións Apolo. Estas medicións utilízanse para discriminar entre o material que se formou no sistema solar interior e o que se creou no exterior”, explica a SINC Timo Hopp, primeiro autor do estudo.
O estudo mostra que a proto-Terra e a Lúa teñen composicións isotópicas de ferro similares entre si e correspondentes á dos meteoritos non carbonáceos, un tipo de corpos celestes formados no interior do sistema solar. Ademais, os autores integraron estes resultados con datos isotópicos previos doutros elementos e realizaron cálculos de balance de masa para Theia e a proto-Terra.
“Así foi como concluímos que Theia formouse con material mesmo máis próximo ao Sol que a Terra”, sinala Hopp. O achado esclarece un pouco máis a orixe do noso satélite, pero os autores subliñan que serán necesarios máis análises para corroborar o papel de Theia no proceso.
Referencia: The Moon-forming impactor Theia originated from the inner Solar System (Publicado en Science)
