A profesora Berta García Orosa, investigadora do Grupo Novos Medios da Facultade de Ciencias da Comunicación, lidera o proxecto Radón en España: percepción da opinión pública, axenda mediática e comunicación do risco. A duración do proxecto é de tres anos (2021-2024) e está financiado polo Consello de Seguridade Nuclear (CSN). O seu obxectivo principal é analizar a percepción pública do radón en España para propoñer accións de comunicación dirixidas a diferentes sectores da sociedade, especialmente nas comunidades autónomas con maior incidencia como é o caso de Galicia, que é a comunidade con maior superficie afectada de España.
O radón é un gas inodoro, insípido e incoloro. Trátase dun gas radioactivo natural procedente da cadea de desintegración do uranio e, por tanto, ubicuo na natureza, pero que constitúe a primeira causa de morte por cancro de pulmón entre as persoas non fumadoras. Malia que o radón non supón un risco ambiental e de saúde pública, a súa prevención é bastante sinxela, xa que se consegue cunha boa ventilación dos espazos de traballo, domicilio ou ocio. Porén, a comunidade científica sinala o escaso coñecemento por parte da sociedade tanto dos riscos como das medidas de prevención.
Dende 1998 a Organización Mundial da Saúde (OMS) cualifica o radón como un elemento canceríxeno cando se produce exposición a niveis altos en interiores e propón métodos para previr e reducir a súa concentración. Aínda que nos últimos anos mellorou a concienciación por parte da cidadanía, segue sendo necesario un traballo máis profundo, tal e como recolle a Directiva Europea 2013/59/Euratom.
O interese deste proxecto radica precisamente no desenvolvemento de accións de comunicación que permitan á sociedade coñecer os riscos da exposición ao radón. Así, por exemplo, as redes sociais veñen considerándose dende hai tempo espazos útiles para a difusión de información sanitaria porque axudan á detección e prevención de enfermidades e favorecen cambios de condura e comportamento.
