A plataforma Neofalantes.gal continuará entre 2024 e 2026 o programa de actuacións para poñer en valor a lingua galega entre as persoas que comezan a falar o dioma través dun proxecto do grupo de investigación Novos Medios da Facultade de Ciencias da Comunicación.
Así o indicou na presentación este mércores 31 de xullo, do convenio que o fará posible, o reitor da USC, Antonio López, xunto co conselleiro de Cultura, Lingua e Xuventude José López Campos, nun acto ao que asistiron tamén o profesor do grupo Novos Medios Xurxo Salgado e o secretario xeral da Lingua, Valentín García.
A economía arredor do galego
Este convenio permitirá seguir actualizando a web social centrada nos neofalantes para facer do idioma un vehículo de uso económico co mundo lusófono e abrir novos campos para a investigación, o ámbito multimedia e a didáctica sobre o neofalantismo. Nela amósanse as traxectorias vitais, as expectativas e as demandas individuais e sociais das persoas neofalantes, e tamén serve para animar ás novas persoas que comezaron a falar en galego na súa vida cotiá.
O reitor salientou que Neofalantes.gal serve como plataforma “para persoas que empregan outra lingua e que empezan a usar o galego para integrarse máis na nosa cultura”. Pola súa banda, o conselleiro subliñou que as persoas neofalantes poden ser “prescritoras para que a xente poida achegarse á lingua galega”, e nese sentido a web é “unha ventá aberta para achegarse e coñecer mellor a nosa lingua”.
Novas formas de comunicación
O fomento desta canle baséase na importancia actual da comunicación e das redes sociais como Instagram, Facebook ou Whatsapp á hora de interactuar na sociedade, pois facilitan o contacto entre neofalantes de todo o mundo e axudan a fomentar o uso da lingua galega e a xerar negocio arredor desta.
Na actualidade, o portal conta con varias seccións sobre o mundo neofalante, sobre actualidade da lingua galega, investigacións lingüísticas, polémicas en redes relacionadas co galego, unha sección de vídeos e, finalmente, unha de opinión, así como as dedicadas a grupos e persoas inscritas.
