Facer da ciencia unha ferramenta útil para a sociedade e comprometida cos seus valores. Ese é o obxectivo da Declaración de Compostela, que aspira a reunir a todo o ecosistema investigador galego para poñer a ciencia e o coñecemento ao servizo da sociedade.
A iniciativa xorde dos tres centros galegos de investigación interuniversitarios: o Centro de Investigación Interuniversitario das Paisaxes Atlánticas Culturais (CISPAC), o Centro de Investigación y Tecnología Matemática de Galicia (CITMAga) e o Centro de Investigación Interuniversitario en Economía y Empresa para la Sociedad (ECOBAS).
Os tres veñen de asinar a que bautizaron como Declaración de Compostela ‘Da ciencia con ciencia’, un manifesto para construír “un ecosistema científico colaborativo baseado na excelencia e utilidade social, cun enfoque aberto”.
Os impulsores desta iniciativa queren reunir a máis centros de investigación galegos en torno ao compromiso coa “ciencia aberta”, é dicir, a “construción dunha nova ciencia cidadá e cun modelo de formación académica en proceso de transformación”.
A preocupación ante un contexto global de crise ecolóxica, cambio climático e o desafío do emprego masivo da intelixencia artificial motivou a estes tres centros, logo da celebración da I Xornada dos Centros de Investigación Interuniversitarios de Galicia, a promover que a ciencia ofreza respostas a estes retos “cun enfoque interdisciplinario”.
“Conscientes de que non están cambiando os tempos senón que estamos cambiando de Tempo, o incremento de coñecemento xa non é un obxectivo“, proclama o manifesto, que CISPAC, CITMAga e ECOBAS aspiran a mellorar cas achegas que vaian xurdindo no proceso de adhesión de novos membros.
Deste xeito, invitan a todo o ecosistema de xeración de coñecemento a Galicia a unirse para procurar solucións aos problemas das sociedades con “métodos transversais” e “interdisciplinarios”. Todo sen perder a referencia da contorna como “punto de partida” para a investigación e subliñando a comunicación como ferramenta clave para fomentar o diálogo ca sociedade e o propio mundo científico.
