O xurdimento das intelixencias artificiais está a provocar moitos cambios e polémicas na vida da xente. Porén, entre todas esas controversias atópanse aplicacións que realmente poden axudar. Neste caso, falamos de LanguageTool, unha ferramenta gratuíta creada no ano 2003 e que agora inclúe sistemas con intelixencia artificial e que permite a corrección en galego.
A aplicación permite a súa inclusión como extensión para Google Chrome. Isto fai que poida analizar o que escribes nas webs e para corrixilo se cometes algún erro. Tamén permite a súa integración con procesadores de texto como LibreOffice e Microsoft Word ou con outros navegadores coma Firefox. O seu funcionamento baséase na análise de patróns lingüísticos, sobre os que se crean e refinan regras que son rigorosamente probadas antes da corrección.
Ata 31 idiomas distintos
Un gran punto forte desta ferramenta é que utiliza un sistema libre e de código aberto. Isto permite a colaboración de voluntarios, e fai que a aplicación permita o seu uso en 31 idiomas, incluído o galego. A diferenza doutros correctores, LanguageTool comprende mellor as estruturas das oracións e suxíreche os cambios explicándoche o motivo destes, destacando posibles erros estilísticos. É dicir, non só é útil, senón que permite aprender mellor.
LanguageTool creouse en 2003 polo programador Daniel Naber mentres facía a súa tese doutoral. 22 anos despois, a aplicación mellorou de forma significativa e agora inclúe novos sistemas de intelixencia artificial e sistemas de suxestións a partir do que se chaman “redes neuronais artificiais”. O proxecto continúa en constante desenvolvemento, incorporando novas melloras grazas á súa comunidade.
O avance neste tipo de aplicacións permite que escribir en galego sexa máis accesible e sinxelo ca nunca. Tamén é unha mostra de como as novas tecnoloxías, ben usadas, poden prestar un servizo público.
Non o coñecía, estouno probando e gústame moito. Grazas!
Non o coñecía, estouno probando e gústame moito. Grazas!