Recentemente o Instituto Nacional de Estatística (INE) publicaba o seu informe sobre calidade de vida nas diferentes comunidades autónomas do estado español. Segundo os datos acadados polo organismo, no 2023 Galicia atopouse por debaixo da media nacional, cunha puntuación de 99,6 puntos, moi afastada da líder na lista, a Comunidade Foral de Navarra (105).
O organismo calcula un índice a través de distintas fontes e empregando distintos parámetros para avaliar o benestar dos cidadáns, como o traballo, os servizos sanitarios ou a proximidade de contornas naturais e contacto co medio ambiente.
No caso da nosa comunidade, segundo a evolución comparada coas enquisas de anos anteriores, a calidade de vida está a empeorar. Se no ano 2020 acadou os 100 puntos, no 2022 descendeu aos 99,9. Os últimos datos, do ano pasado, manteñen esta visión: 99,6. Tan só Canarias atópase por debaixo de Galicia (98,9), xunto a cidade autónoma de Ceuta (95,9). No top da lista atópanse Navarra, a Rioxa (104,1) e Aragón (103,5), cunha media nacional superior á de Galicia: 101,5 puntos.
Ata nove parámetros para avaliar a calidade de vida
Agora, unha nova ferramenta do INE permite aos propios cidadáns consultar, atendendo as súas prioridades vitais, cal é a comunidade autónoma que mellor garante ditas preferencias. O Índice Multidimensional de Calidade de Vida analiza ata nove parámetros: condicións materiais, traballo, saúde, educación, lecer e relacións sociais, seguridade física e persoal, dereitos básicos e gobernanza, contorna e medio ambiente e experiencia xeral de vida. Cada un deles pódese axustar tendo en conta a súa importancia para cada usuario, valorando dito aspecto nunha escala de 1 a 10 puntos. Así, dependendo das preferencias de cada un, o resultado muda:
Se o único valor fose o traballo, as mellores comunidades autónomas serían as Illas Baleares, seguida de Cataluña e Navarra. Ao final da lista atópanse as cidades autónomas de Melilla e Ceuta. Porén, no caso da cobertura sanitaria, o Navarra pasa a ser o mellor lugar para vivir,seguida do País Vasco. Galicia avanza uns cantos puntos se só temos en conta o aspecto da saúde, superando a Andalucía, aínda que permanece por debaixo da media nacional. Se o que máis valoramos é a seguridade, Asturias é o noso lugar idóneo.
En xeral, Navarra garante a práctica totalidade dos parámetros analizados, mentres que Galicia suspende na meirande dos parámetros en comparación coa media nacional.
E ti, que preferencias tes en canto á calidade de vida? Consúltao na seguinte ligazón.
