Galicia tivo mellor calidade de vida que Canarias en 2023, pero peor que as 15 comunidades autónomas restantes. É máis, está por debaixo da media nacional. Así o recolle un informe publicado este mércores polo Instituto Nacional de Estatística (INE). O organismo calcula un índice a través de distintas fontes, e nel valóranse nove factores. Entre eles, o traballo, o medio ambiente e a saúde. No cómputo global Galicia ten unha puntuación de 99,6 puntos, afastada da que acada Navarra, líder na lista (105).
En relación aos informes de anos anteriores, a tendencia en Galicia é decrecente. É dicir, segundo as enquisas e estatísticas realizadas polo INE, a calidade de vida está a empeorar. En 2020 acadaba 100 puntos, mentres que en 2022 descencía aos 99,9 e agora, cos últimos datos de 2023, confírmase a tendencia: baixa ata os 99,6. Por debaixo dela tan só está Canarias (98,9) e a cidade autónoma de Ceuta (95,9). No lado oposto están Navarra, de primeira no ránking, seguida da Rioxa (140,1) e de Aragón (103,8). No que respecta á media nacional, o índice global de calidade de vida acada os 101,5 puntos.
Análise por factores
O INE non só achega un índice global sobre a calidade de vida; tamén fai unha clasificación en función dos factores a estudo. Así, a categoría que sitúa Galicia nunha mellor posición é a seguridade física e persoal, coa que obtén 105,2 puntos. Neste aspecto escala ao quinto posto. Despois estaría a educación (111,3) que a coloca de sexta. Baixa ata a oitava posición en condicións materiais de vida, con 100,8 puntos.
No resto de variables, Galicia sitúase á cola do ránking. Queda no número 12 en cuestións de traballo, valoradas en 100,6 puntos. Acada o posto 17 —dos 20 que hai, incluíndo as dúas cidades autónomas e o índice global— nos indicadores de saúde (99,3), lecer e relacións sociais (94,7) e contorna e medio ambiente (98,6). Baixa outra outra posición, ata situarse na 18, en gobernanza e dereitos básicos (93). E, finalmente, Galicia está no último posto, en comparación co resto de comunidades autónomas, no que respecta á experiencia xeral de vida: a posición 20 con 93 puntos.
Se os datos se analizasen illadamente do resto de lugares estudo, o ránking en Galicia variaría considerablemente. O mellor indicador está na educación, dado que acada a puntuación máis elevada superando con creces os 100 puntos. Despois estaría a seguridade física e persoal e continuaríase coas condicións materiais de vida. Por debaixo do cento estarían, nesta orde de maior a menor puntuación, a saúde, a contorna e o medio ambiente, o lecer e as relacións sociais, a experiencia xeral de vida e a gobernanza e os dereitos básicos. Uns datos e unha análise puramente cuantitativa que, cando menos, tamén invita á reflexión.
