O 21 de novembro de 2011 naceron 1.277 persoas en España. E o 7 de febreiro de 1957 é o aniversario doutras 1.428. Se ti tamén queres saber con canta xente compartes o día máis especial do calendario tan só tes que probar unha curiosa ferramenta deseñada polo Instituto Nacional de Estatística (INE). Con tan só tres clics podes seleccionar o día, o mes e o ano do teu nacemento e, automaticamente, descubrirás cantas persoas sopran as velas no mesmo intre ca ti.
Os datos da aplicación extráense das datas de nacemento das persoas nadas e residentes en España ata o 1 de xaneiro de 2024. É dicir, que non se ten en conta o número de persoas falecidas anteriores a esa data, que naceran posteriormente ou, incluso, que emigraran.
Datos por meses e décadas
Esta ferramenta do INE permite extraer información variada. Se filtras por ano, poderás ver unha táboa dividida en 12 meses e 365 días. Cada cadro ten asignada unha cor: canto máis clara é, menos nacementos; canto máis escura, máis. Se se toma como exemplo o ano 1973, o 4 de xullo é o que anota máis aniversarios, con 1.951. No lado contrario está o 25 de decembro dese mesmo ano, cando menos persoas de 1973 sopran as velas: 1.397. En termos máis globais, maio rexistra a cifra máis alta, con 1.810. E novembro a máis baixa, con 1.605.
Outro dos gráficos dispoñibles analiza o mes con máis aniversarios segundo a década de nacemento. Dende 1930 a 1939, o maior rexistro dáse en febreiro e, o menor, en xullo. Entre 1960 e 1969, está en primeiro posto setembro e, en último, decembro. Isto coincide co mesmo patrón do que levamos da década actual. Finalmente, a ferramenta ofrece unha gráfica completa do número de persoas segundo o ano de nacemento, cunha pronunciada caída a finais dos anos setenta e un novo descenso dende o 2008.
Podes acceder á ferramenta do INE nesta ligazón.
A min o enlace para ver a ferramenta non me vai, este si:
https://public.tableau.com/views/infografia_cumple/Dashboard12?:showVizHome=no&:embed=true