A empresa biotecnolóxica SunRock Biopharma, con sede en Santiago, lidera un proxecto que mobiliza 1,84 millóns de euros para investigar enfermidades inflamatorias intestinais, un grupo de patoloxías no que encaixan doenzas como a colite ulcerosa e a enfermidade de Crohn. A iniciativa, denominada CATIB, foi seleccionada pola Axencia Estatal de Investigación e está financiada polo Ministerio de Ciencia, Innovación e Universidades.
CATIB céntrase nun anticorpo en investigación, SRB5, dirixido a unha diana relacionada con células implicadas en procesos inflamatorios. “O proxecto busca avanzar na súa fase preclínica, o paso necesario antes de calquera formulación posterior en desenvolvemento biomédico”, salientan dende SunRock Biopharma, socia do Clúster Tecnolóxico Empresarial de Ciencias da Vida (Bioga).
Colaboración público-privada
De feito, o traballo vaise desenvolver nos hospitais. No consorcio participan os institutos de investigación sanitaria de Santiago (IDIS) e Galicia Sur (IISGS), ademais do CIC bioGUNE do País Vasco e da Fundación para a Investigación de Málaga en Biomedicina e Saúde (FIMABIS). Un equipo “a varias mans” para “acelerar o coñecemento útil”. A empresa galega que lidera o proxecto sinala que os hospitais de Vigo e Santiago van xogar un “papel estratéxico” na investigación.
Do orzamento total, máis dun millón de euros canalízase cara a SunRock Biopharma en forma de préstamo. Preto de 400.000 euros chegan como subvención aos equipos galegos a través do IDIS e do IISGS, o que conecta a investigación hospitalaria coa innovación empresarial.
“Liderar un proxecto da Axencia Estatal de Investigación desde Galicia e facelo da man dos equipos hospitalarios é unha oportunidade para sumar capacidades aquí: na empresa, nos institutos sanitarios e no ecosistema biomédico galego”, sinalan desde SunRock Biopharma. Con CATIB, a compañía reforza a súa aposta por proxectos que conectan ciencia e tecido produtivo, cun obxectivo dobre: “Xerar coñecemento e consolidar capacidades tecnolóxicas en Galicia con proxección exterior”.
