Únete á nosa canle de Whatsapp
Un estudo da Universidade de Granada e a Pontificia Universidade Católica de Arxentina desvela que o estado psicolóxico modifica o sabor dos alimentos que comemos. Os resultados do traballo publicáronse na revista Food Quality and Preference. Os autores demostraron que, fronte á estabilidade que se lle presupón ás preferencias alimentarias adquiridas, as respostas afectivas e o valor de recompensa de alimentos como o café, o chocolate, a cervexa ou o zume de pomelo parecen sufrir variacións en función, por exemplo, de se nos sentimos tensos, temos fame ou estamos preocupados polo noso peso.
O estudo indica, por exemplo, que naquelas persoas que consomen habitualmente alimentos amargos, a tensión reduce a aversión ao sabor amargo do café, mentres que o chocolate produce un maior rexeitamento tras incrementar a preocupación polo peso corporal. No traballo participaron 59 adultos que foron divididos en dous grupos: aqueles que consumían produtos amargos habitualmente e os que non.
Todos eles tiveron que saborear mostras de alimentos amargos baixo diferentes estados motivacionais que os investigadores lles induciran mediante imaxes. Durante a proba, ademais, empregáronse índices afectivos derivados da análise de expresións faciais e indicadores do desexo de consumir a partir de respostas de aproximación/evitación.
Como explica David García-Burgos, investigador do grupo de Neuroplasticidad y Aprendizaje da UGR e director do estudo, “estes achados revelan por primeira vez non só a implicación dos compoñentes afectivos-gustativos na superación do rexeitamento innato ao sabor amargo, senón tamén como os nosos estados psicolóxicos repercuten no sabor da comida que inxerimos”.
Dado que a modulación do valor de recompensa do sabor dos alimentos dependendo do ánimo é unha vía importante na regulación da conduta alimentaria, “este traballo supón un paso máis na comprensión dos mecanismos implicados na selección de produtos amargos”, sinala o autor.
Ademais, engade, estes resultados “son especialmente importantes na medida en que as preferencias e consumo de alimentos amargos, como verduras e froitas, promóvense como unha estratexia para facer fronte á epidemia da obesidade e promover as dietas saudables“.
